هێزێن عيراقى به‌رهه‌ڤيێن هێرشكرنێ ل سه‌ر پێشمه‌رگه‌ى دكه‌ن
ئه‌ڤرۆنيوز:
جڤاتا ئاسايشا هه‌رێما كوردستانێ راگه‌هاند، هێزێن عيراقى ل نيزيك مه‌خموور يێن هاتينه جهگيركرن ويێ به‌رهه‌ڤيێ بۆ هێرشكرني ل سه‌ر پێشمه‌رگه‌ى دكه‌ن.
جڤاتا ئاسايشا هه‌رێما كوردستانێ دتويته‌رى دا راگه‌هاند” ئه‌م يێن هاتينه ئاگه‌هداركرن كو هێزێن عيراقى يێن ل ده‌وروبه‌رێن مه‌خموورێ ل باشوورێ رۆژئاڤايێ هه‌ولێرێ هاتينه جهگيركرن ويێ به‌رهه‌ڤيێ دكه‌ن بۆ هێرشكرنێ ل سه‌ر هيزێن پێشمه‌رگه‌ى ل نێزيك وێ ده‌ڤه‌رێ”.
ئاماژه كريه ژى” پێزانينێن هه‌والگيرى دياردكه‌ن كو دده‌مێ پێنج رۆژێن بۆرى دا، له‌شكرێ عيراقێ وحه‌شدا شه‌عبى وپۆليسێن فيدرالى يێن هاتينه هنارتن بۆ وێ ده‌ڤه‌رێ وپلان يا هه‌ى هێرشێ بكه‌نه سه‌ر گوێر وديبه‌گه ودووبز، ئه‌و رێيا كه‌ركووكێ ومووسل پێكڤه گرێدده‌ت”.
جڤاتا ئاسايشا هه‌رێما كوردستانێ دياركر” هيزێن پێشمه‌رگه‌ى ل ئوكتۆبه‌را 2017 بۆ رێگريكرنێ ل پێكدادانێن له‌شكرى، بۆ وان ده‌ڤه‌رێن نوكه لێ جهگيربووين، خوه‌ڤه‌كێشابوو، له‌وما داخوازێ ژ حوكمه‌تا عيراقێ دكه‌ين هاتنا له‌شكرێ عيراقێ ب راوه‌ستينيت”.
جڤاتا ئاسايشا هه‌رێمێ، داخواز ژ جڤاكێ نێڤده‌وله‌تى كر كو لڤينێن له‌شكرى يێ شه‌رخوازى يێن عيراقێ ريسوا بكه‌ت وداخوازێ ژ حوكمه‌تا عيراقێ بكه‌ت داخوازا هه‌رێما كوردستانێ بۆ چاره‌سه‌ركرنا كێشان ب رێيا دانوستاندنێ په‌سه‌ند بكه‌ت .
