هێزێن هه‌ڤپه‌يمانان: ئێدێ جهێن بن ده‌ستێ داعش زووتر دهێنه رزگاركرن
ئه‌ڤرۆ نيوز:
كولۆنێل كريس گارفه‌ر ئاخفتنكه‌رێ ب ناڤێ هه‌ڤپه‌يمانێن دژى داعش راگه‌هاند: هه‌ڤبه‌ركى ل گه‌ل به‌رى نوكه چه‌كدارێن داعش نه‌شێن به‌ره‌ڤانيه‌كا ب هێز بكه‌ن و ل ده‌مێ چوونا ناڤ ده‌ڤه‌ره‌كا نوو بۆ رزگاركرنێ ب ساناهيتر ئه‌و جهـ ژ بن ده‌ستێن وان دهێته ده‌ر.
ئه‌ڤ گۆتنێن گارفه‌ر د چارچۆڤێ چاڤپێكه‌فتنه‌كا كه‌نالێ CNN يێ ئه‌مريكى دا بوون كو تێدا به‌حسێ شه‌رێ دژى داعش و هێرشێن هه‌ڤپه‌يمانان كريه بۆ سه‌ر وێ رێكخراوێ.
گارفه‌رراگه‌هاند كو رۆژانه دڤێت ژمارا چه‌كدارێن داعش بزانن، به‌لێ ئه‌وا ئه‌و تێبينى دكه‌ن ئه‌وه كو ده‌ما دچنه جهه‌كێ نوو، ب ساناهيتر ژ جاران ئه‌وى كارى دكه‌ن و چه‌كدارێن داعش شيانێن به‌ره‌ڤانيه‌كا ب هێز نه‌ماينه، هه‌روه‌كو شيانێن وان يێن شه‌رى يێن كێم بووين.
ئاخفتنكه‌رێ ب ناڤێ هه‌ڤپه‌يمانان ئاماژه ب هه‌بوونا 19 هه‌تا 25 هزار چه‌كدارێن داعش ل عيراق و سوريا دكه‌ت، “به‌لێ بزاڤێ دكه‌ن رۆژانه د راستيا وێ ژمارێ دا پشت راست بن”.
ب ره‌نگه‌كێ رۆژانه چه‌كدارێن داعش ده‌ڤه‌ران ژ ده‌ست دده‌ن و دووماهى شكه‌ستنا وان ژى وه‌كو CNN دياركرى ژ ده‌ست دانا مه‌نبج بوو كو دوهى ب ته‌مامى هاته ئازادكرن.
ده‌رباره‌ى پلانا رزگاركرنا مووسل ژى دا زانين كو پلانا كونترۆلكرنا مووسل ب گۆره‌ى وێ پلانێ ئه‌وا بۆ هاتيه دانان يا ب رێڤه دچيت و ل هنده‌ك جهان ب خاڤى و ل هنده‌ك جهان ژى ب له‌زتر يا ب رێڤه دچيت، “ئه‌م ژى د ئاماده‌ينه د روويێ لوجستيكى دا پشته‌ڤانيێ ل هێزێن ئه‌منى يێ عيراقێ بكه‌ين و مه شيره‌تكار ژى يێن هه‌ين بۆ ئاماده‌كرنا وان بۆ ئه‌ركێ داهاتى ل مووسل”.
ئاخفتنكه‌رێ هه‌ڤپه‌يمانان گۆتژى: “ئه‌م مژوولى مه‌شكرنێ ب چه‌كدارێن ئه‌وان هێز و پۆليس و عه‌شيره‌تێن ده‌ڤه‌رێنه يێن دێ پشتى رزگاركرنێ وێ ده‌ڤه‌رێ پارێزن و رێگريێ ل ڤه‌گه‌ريانا داعش كه‌ن”.
