هێمن هه‌ورامى: هه‌رێما كوردستانێ سه‌لماند ئه‌كته‌ره‌كا كاريگه‌ره دهه‌ڤسه‌نگيا ئه‌منى ل ده‌ڤه‌رێ
ئه‌ڤرۆنيوز:
ئه‌ندامه‌كێ سه‌ركردايه‌تيا پارتى ديموكراتى كوردستان دبێژيت، ديتنه‌كا گه‌له‌ك ساده‌يه هه‌كه وه‌سا بهيته زانين كو پشتى 16 ئوكنۆبه‌رێ پێگه‌هێ كوردان لاواز بوويه، يان كورد هاتبنه په‌راوێز خستن.
دكونفرانسێ ڤالداى گلۆب، كو ل رۆژا 19 ڤێ هه‌يڤێ ده‌ست ب كارێن خوه كر كو ژلايێ په‌يمانگه‌ها رۆژهه‌لاتناسيێ يا نێزيك ژ كۆچكا كريملينێ ل مۆسكۆ هاتيه ب رێڤه‌برن، هێمن هه‌ورامى ئه‌ندامێ سه‌ركردايه‌تيا پارتى بۆ به‌حسكرنا پرسا كوردي كو ئێك ژ په‌نه‌لێن كۆنفرانسى بوو، پشكدارى كر.
هيمن هه‌ورامى دداخۆيانيه‌كێ دا بۆ كوردستان 24 گۆت”ئه‌و چه‌ندا دڤى كۆنفرانسى دا كو ژ سالێن بۆرى جوداكرى، ئه‌وه كو ئه‌ڤ ساله وه‌زيرێن ده‌رڤه يێن ئيرانێ ورووسيا ونوونه‌رێن 31 وه‌لاتان و 134 دبلۆماتكار وكه‌سايه‌تيێن ئه‌كاديمى به‌رهه‌ڤ ببوون”.
هه‌ورامى گوت ژى” پرسيارا كونفرانسى ئه‌وبوو، ئايا پرسا كوردى، پرسه‌كا سه‌ره‌كى يا رۆژهه‌لاتا ناڤينه يان نه، مه دوى په‌نه‌لى دا، روانگا سه‌ركردايه‌تيا سياسى يا كوردستانێ سه‌باره‌ت وێ پرسێ به‌رچاڤكر”.
ل دۆر كاريگه‌ريا نه‌رێنى يا خيانه‌تا 16ئوكتۆبه‌را 2017 ل سه‌ر پێگه‌هێ هه‌رێما كوردستانێ ژروويێ سياسى ڤه، كو هنده‌ك شرۆڤه بۆ دچن كوردان ژبه‌ر وێ خيانه‌تێ پێگه‌هێ خوه يێ جاران يێ ژده‌ستداى، هێمن هه‌ورامى گۆت” ئه‌ڤه شرۆڤه‌كا گه‌له‌ك ساده‌يه، هه‌كه وه‌سا بهێته زانين پشتى 16 ئوكتۆبه‌رێ پێگه‌هێ كوردان لاواز بوويه، يان هاتينه په‌راوێز خستن، چونكى هه‌ڤكێشێن دناڤ كوردستانێ ورۆژهه‌لاتا ناڤين وشه‌رێ تيرۆرێ وپه‌يوه‌نديێن دناڤبه‌را وه‌لاتان وپرسێن ئه‌منى ونه‌بوونا ديموكراسيێ ل ده‌ڤه‌رێ وه‌دكه‌ت كو هه‌ڤكێشه دديناميكى بن وئه‌كه‌ر بشێن رۆل وپێگه‌هێ خوه به‌رچاڤكه‌ن”.
خوياكر”هه‌رێما كوردستانێ سه‌لماند كو ئه‌كته‌ره‌كا كاريگه‌ره دحه‌واندنا ئاواره وپه‌نابه‌ران، ل هه‌ڤسه‌نگيا ئه‌منى ل ده‌ڤه‌رێ، ل به‌رچاڤكرنا رێيا پرۆسه‌كا گرنگ يا ئاڤه‌دانكرنێ ل هه‌رێما كوردستانێ، له‌وما ئه‌و پێگه‌ها هه‌ريمێ ب وێ چه‌ندێ ناهێته حوكمدان ب ده‌مه‌كێ پشتى 16 ئوكتۆبه‌رێ عه‌بادى بزاڤ كربيت فرۆكخانان بگريت وكيانێ هه‌رێما كوردستانێ نه‌مينيت، ئێدى رۆلێ هه‌رێما كوردستانێ نه‌هێته ديتن”.
ئاماژه كر” چوونا شاندێ هه‌رێمێ بۆ فه‌ره‌نسا وهاتنا وه‌زيرا به‌رگريا ئه‌لمانيا بۆ هه‌ولێرێ وپشكداريا شاندێ بلندێ هه‌رێمێ ل دافوس وچوونا شاندێ بلندێ هه‌رێمێ بۆ كۆنگرێ ئاسايشێ ل ميونشين وپشكداريا مه دڤى كۆنفرانسى دا ل دۆر رۆژهه‌لاتا ناڤين ل موسكۆ هه‌روه‌سا سه‌ره‌دانێن مه‌زنه به‌رپرسێن دى كو ل پاشه‌رۆژه‌كا نێزيكدا بۆ هه‌رێما كوردستانێ دێ هێنه ئه‌نجامدان، هه‌موو به‌لگێن وێ چه‌ندێ نه كو پێگه‌هێ كوردان پێگه‌هه‌كێ پاراستيه وكورد ئه‌كته‌ره‌كێ گرنگه، نه عه‌بادى ونه خه‌لكێ دى ژى كو دخواستن 16 ئوكتۆبه‌رێ بجهبينن، بۆ وێ چه‌ندێ كيانێ دستووريێ هه‌رێما كوردستانێ نه‌هێلن، به‌روڤاژه هه‌ڤكێشه يێن ل سه‌ر وان دشكين”.
