10 سالێن دى مین و تەقەمەنی ل دهۆكێ دێ ب دووماهى هێن
ئەڤرۆ نیوز، نەوزاد هلۆری:
رێڤەبەریا گشتی یا كاروبارێن مین و تەقەمەنیان ل پارێزگەها دهۆكێ ب بەرهەڤبوونا نوونەرێ رێكخراوا MAG د پرێس كونفرانسەكێ دا ئامارا چالاكیێن مین و تەقەمەنیان ل سنوورێ پارێزگەها دهۆكێ و دەڤەرێن رزگاركریێن سەر ب هەرێما كوردستانێ راگەهاندن و رێڤەبەرێ گشتیێ كاروبارێن مین و تەقەمەنیان ژی دیاركر كو ب گۆرەی پلانانا وان پرۆسەیا مینپاكیێ ل پارێزگەها دهۆكێ هەتا 10 سالێن دى دێ دووماهی هێت.
مەسعود مەلا شەفیق رێڤەبەرێ گشتيێ كاروبارێن مین و تەقەمەنیان ل پارێزگەها دهۆكێ دیاركر كو پرۆسا مینپاكیێ ل سنوورێ پارێزگەها دهۆكێ يا بەردەوامە و بۆ ئەڤرۆ نیوز گۆت” رژێمێن عیراقێ و رێكخراوێن تیرۆرستی و هێزێن میلشیان بۆگەهشتنا سنوورێ پارێزگەها دهۆكێ و بجهكرنا مەرەمێن خوە، هژمارەكا مه‌زن یا مین و تەقەمەنیان دانایە ، بەلێ ب پلانێن حوكمەتا هەرێما كوردستانێ و رێڤەبەریا گشتی یا كاروبارێن مین و تەقەمەنیان ل دهوكێ هژمارەكا مه‌زن یا مین و تەقەمەنیان ل زەڤی و ئاخ و سنوورێ پارێزگەها دهۆكێ ب گشتی هاتینە راكرن، بەلێ ل گەل ڤێ یەكێ ژی هێشتا پشكەكا زۆر یا ئاخا پارێزگەها دهۆكێ ب تمامی نەهاتیە پاقژكرن “.
مه‌سعودى گۆت ژى” بۆ نەهێلانا مین و تەقەمەنیان ل پارێزگەها دهۆكێ ، رێڤەبەریا گشتی یا كاروبارێن مین و تەقەمەنیان ب هەڤكاری ل گەل جڤاتا وەزیران و رێكخراوێن تایبەت دوارێ مین و تەقەمەنیان و جهێن شولەژێ، پلانەكا دومدرێژ يا هه‌ى و هەتا 10 سالێن دى پروسەیا منیپاكیێ دێ ل سنوورێ پارێزگەها دهۆكێ ب ئێكجاری ب دووماهی هێت هه‌كه چو كێشەیێن نوو مینا شەر و ئالۆزی نەكەڤنە بەرسینگێ مە و هەرێما كوردستانێ”.
ب گۆرەی ئامارا رێڤەبەریا گشتی یا كاروبارێن مین و تەقەمەنیان ل پارێزگەها دهۆكێ كو ئەڤرۆ رۆژا چوارشەمبی 14/2/2018 ل بارەگایێ رێڤەبەریا ناڤبری هاتینە راگەهاندن دیاردبیت كو ل سالا بۆری 512 مینێن دژی مرۆڤ و 63 مینێن دژە تانك و 319 مینێن سەرپێ هاتینە ژناڤبرن ، ل گەل ڤەگۆهاستنا 449 مینێن دژە كەسی 72 مینێن دژە تانك و 492 مینێن سەرپێ و هەموو ئەڤ چالاكیە ژلایێ رێڤەبەریا مە و رێكخراوا MAG هاتیە ئەنجامدان “.
هەر ب گۆرەی ئامارا رێڤەبەریا ناڤبری ل سالا بۆری پێنج كەس ل سنورێ پارێزگەها دهۆكێ و 93 كەس ل دەڤەرێن رزگاركری بووینە قوربانیێن مین و تەقەمەنیان و ژ سەرجەمێ 762 زەڤیێن مین و تەقەمەنیان 328 زەڤی هاتینە پاقژكرن كو د بیتە رووبەرێ 11 ملیۆن و 387 هزار و 291 مەتر چارگوشە ژ سەرجەمێ 13 ملیۆن و 891 هزار و 710 مەترێن چارگوشە.
دهێتە زانین كو ل سنورێ پارێزگەها دهۆكێ 29 تیمێن دەستكاری و تیمەكا تەقاندنێ، حەفت تیمێن میكانیكی ، تیمەكا روپێڤان ، 17 تیمێن هوشیاركرنێ و سێ تیمێن سەیان ل هەردو رێڤەبەریێن گشتی یا كاروبارێن مین و تەقەمەنیان و رێكخراوا MAG هەنە.
