هەرێما كوردستانێ و دەولەتا قەتەرێ دوپاتیێ ل سەر ب هێزكرنا پەیوەندییان د وارێ وزێ دا دكەن
دوهی سێشەمبی 25 ئادارا 2025، مەسرور بارزانی سەرۆكێ حوكمەتا هەرێما كوردستانێ د چارچۆڤەیێ سەرەدانا خوە دا بۆ وەلاتێ قەتەر، ل دەوحەیا پایتەختا وی وەلاتی ل گەل سەعد بن شریدە ئەلكەعبی، وەزیرێ دەولەتێ بۆ كاروبارێ وزێ یێ قەتەری كۆمبوو.
ب گۆڕەی بەیاننامەیەكا حوكمەتا هەرێما كوردستانێ « د كۆمبوونێدا دانوستاندن ل دۆر ب هێزكرن و پێشڤەبرنا پەیوەندیێن هەرێما كوردستانێ و وەلاتێ قەتەرێ د وارێ وزێ دا هاتە كرن».
هەر د چارچۆڤەیێ سەرەدانا خوە دا بۆ وەلاتێ قەتەر، مەسرور بارزانی، سەرۆكێ حوكمەتا هەرێما كوردستانێ ل گەل ل گەل شێخ بەندەر بن محەمەد ئال سانی، سەرۆكێ دەزگەهێ وەبەرئێنانێ ل وەلاتێ قەتەر كۆمبوو.
د دیدارەكێدا ب بەرهەڤبوونا محەمەد ئەلسوەیدی، سەرۆكێ جڤاتا بڕێڤەبرنا دەزگەهێ ناڤبری، دوپاتی ل گرنگییا پێشڤەیرنا پەیوەندیێن دو ئالییانە د وارێن وەبەرئێنانێ و وزێ و ژێرخانەیا ئابووری و چاكسازیكرنێ د سیستەمێ بەنكیدا هاتە كرن.
ل رۆژا دوشەمبی 24 ئادارا 2025،مەسرور بارزانی، سەرۆكێ حوكمەتا هەرێما كوردستانێ ب سەرەدان و ڤەخواندنەكا فەرمی گەهشتبوو دەوحە پایتەختێ قەتەر و ل گەل محەمەد بن عەبدولرەحمان ئال سانی، سەرۆك وەزیرێن قەتەرێ و وەزیرێ دەرڤە كۆمببوو.
د وێ كۆمبوونێدا سەرەرای گەنگەشەكرنا دووماهی پێشهات و گورانكاریێن ئیراقێ و دەڤەرێ، بیر و بۆچوون ژی ل دۆر ب هێزكرنا پەیوەندیێن هەرێما كوردستانێ و وەلاتێ قەتەرێ لێكگۆهارتن.
