هەكە ناڤخوەیا كوردستانێ یا ئێكگرتی نەبیت بەغدا مەرجێن خوە دسەپینیت
عەزیز هەورامانی:
عەتا قەرەداخی، ڤەكۆلەرێ سیاسی دبێژیت: دخوازین وەكو مللەتەك بمینین و پێشبكەڤین و دەزگەهێن مە د سەقامگیر بن، ئەو مافێن مە هەین ژ دەست نەدەین و گەشێ پێ بدەین و پێدڤیە د ئێكڕێز و ئێكگرتی بین.
عەتا قەرەداخی، بۆ ڕۆژنامەیا (ئەڤرۆ) زێدەتر گوت» ئەوا نوكە هەی ئەم ب لاواز ل بەردەم ئالیێ ئیراقی دەردكەڤین، دبینین ڕۆژ ل دووڤ ڕۆژێ بەغدا مەرجێن زێدەتر ل سەر خەلكێ هەرێما كوردستانێ دسەپینیت تنێ ئەوە دزانیت ناڤخوەیا كوردستانێ یا ئێكگرتی نینە، دەمێ ئێكگرتن نەبیت وی دەمی هێزەك نابیت فشارێ ل سەر بەغدا دروست بكەت ئەوژی ب حەز و ئارەزوویا خوە چاوان بخوازیت وەسا مەرجێن خوە دسەپینیت، ڤێ چەندێ ژی زیان بۆ هەموو گەلێ كوردستانێ هەیە» .
قەرەداخی ئاماژەكر» هەكە ئالیێن كوردستانی بشێن ئێكگرتنەكێ دروست بكەن هەکە د ناڤخوەیا كوردستانێ دا د ئێكگرتی نەبین بلا ل دەرڤە و بەغدا ئێكگوتار بن و وەكو تیمەكێ كاربكەن، حوكمەتا ئیراقێ حوكمەتا ناسیۆنالیستا ئەرەبی یە، ل دەف سوننە و شیعەیان وێ ناسیۆنالیستیێ جوداهی نینە ژ وێ ناسیۆنالیستیا كوردستان ئەنفال وكیمیابارانكری و كوردستان وێرانكری، هەمان ئەقلیەتە وهیچ نەهاتیە گوهۆڕین».
ڕۆهنكر ژی» ئەو حوكمڕانیا ناسیۆنالیستی یا نوكە ل بەغدا نوكە چاڤێ وێ ب كوردان ناڕابیت بگرە چاڤێ وان ب خەلكێ پێشكەفتنخوازێ ئەرەب ژی نارابیت، ژبەركو ئەو بۆچوونەكا خرابە كو هەموو تشتەك بهێتە ڕادەستكرن بۆ بەغدا و ب ڤێ چەندێ كوردستان دێ بیتە شاما شەریف، بەرۆڤاژی، بەغدا مە پێخوەش بیت یان نە پایتەختێ ئیراقا ئەرەبی یە و ئەو دەولەتە داگیركەرا پشكەكا كوردستانێ یە، هەموو بزاڤان دكەت تە هیچ دەستهەلاتەك نەمینیت و كەسایەتیا تە ب شێوەیەكی بشكێنیت كو ل سەر پیێن خوە نەڕاوەستی».
