هەلبژارتن ل ئیراقێ گوهۆڕینان پەیدا ناكەن
سەرۆكێ بەرێ یێ كۆمسیۆنا سەربخوەیا هەلبژارتنان ل ئیراقێ راگەهاند، هەلبژارتن د دەمێ خوە یێ دیاركریدا دێ هێنە ئەنجامدان و بەرهەڤیێن باش هاتینەكرن بۆ رێڤەچوونا پرۆسەیا هەلبژارتنان، هەروەسا دیاركر ژی، هەلبژارتنێن ڤێجارێ ژی چو گوهۆڕینان ل ئیراقێ پەیدا ناكەن ژ بەر كو هەر هندەك ئالیێن دەستهەلات هەی دێ سەركەڤن.
سەربەست ئامێدی، سەرۆكێ بەرێ یێ كۆمسیۆنا سەربخوەیا هەلبژارتنان ل ئیراقێ بۆ رۆژنامەیا (ئەڤرۆ) گوت « هەلبژارتنێن ئیراقێ د دەمێ خۆ یێ دیاركریدا دێ هێنە ئەنجامدان و ناهێنە پاشئێخستن، چونكە هەموو ئالیێن سیاسی د رژدن ل سەر رێڤەچوونا پرۆسەیا هەلبژارتنان و بەرهەڤیێن باش هاتینەكرن بۆ ئەنجامدانا وان، هەروەسا بودجەیەكا مەزن ژی هاتیە مەزاختن بۆ رێڤەچوونا هەلبژارتنان و ئالیێن نێڤدەولەتی بەری نوكە رێكەفتن هەیە خوە ژ ئیراقێ ڤەكێشن، لەوڕا ڤەكێشانا هێزێن ئەمریكی ژی چو كاریگەری ل سەر پرۆسەیا هەلبژارتنان نابیت».
گوت ژی» پرۆپاگندەیێن دهێنە بەلاڤكرن ل دۆر گوهۆڕینا رەوشا ئیراقێ ژی چو راستی بۆ نینە و ئەڤە هەموو هەڤڕكییا د ناڤبەرا ئالیێن سیاسییە كو ڤان پرۆپاگندەیان بەلاڤ دكەن، ئالیێن ئیراقی دەست ب هەڤركییەكا دژوار كریە بۆ هەلبژارتنان و ئالی هەنە پارەیەكێ مەزن د دەستدا هەیە و میلیشیا و دەستهەلات هەیە و پرۆپاگندەیان بەلاڤ دكەن ل دۆر ریڤەچوونا پرۆسەیا هەلبژارتنان».
سەربەست مستەفا رۆهنكر ژی» ب دیتنا من دناڤا بنگەهێن هەلبژارتناندا دەلیڤەیا سەختەكارییان نەمایە و هەر تشتەكێ ل دۆر سەختەكارییان دهێتە بەلاڤكرن دچیتە د چوارچوڤەیێ هەڤركییا ئالیێن پشكدار د هەلبژارتناندا، چونكە ئامیرێن نوو یێن دەنگدانێ چو دەلیڤە نەهێلایە بۆ سەختەكاریێ، كەس نەشێت جهێ كەسەكێ دی دەنگی بدەت و چو كەس و ئالی نەشێن وەك بەرێ سندووقان تژی دەنگ بكەن بۆ بەرژەوەندیێن خوە، ئەز باوەرم هەلبژارتنێن ڤێجارێ گوهۆڕینان پەیداناكەن ل ئیراقێ، ژ بەر كو پشتی سالا 2003ێ دەسهەلات د دەستێ هندەك ئالیێن سیاسیدایە و هەر ئەو دیسان دێ سەركەڤن».
ل دۆر كوردان، سەرۆكێ بەرێ یێ كۆمسیۆنا هەلبژارتنان گوت» دەمێ پێكئینانا هەڤپەیمانییان دوماهی هاتیە و دەلیڤە نەمایە، بەلێ پشتی هەلبژارتنان دەلیڤە هەیە بۆ پێكئینانا هەڤپەیمانییان، مخابن كوردان شكەستن ئینایە بۆ پێكئینانا لیستەكا ئێكگرتی ب تایبەتی ل كەركووكێ و نەینەوا كو پێدڤی بوو كوردان ب ئێك لیست پشكداری د هەلبژارتناندا كربایە، بەلێ ژ بەر هەڤركییا حزبی كورد نەشیان ئێكگرتی بن بۆ هەلبژارتنێن ڤێجارێ یێن ئیراقێ، مخابن بەرژەوەندیێن حزبی مەزنترن ژ بەرژەوەندییا گشتییا كوردان هەتا بشێن ب ئێك لیست بچنە د هەلبژارتناندا».
