هەوەکا مەزنا خووین بەخشینێ ل قەزا ئامێدیێ دەست پێکر
ئەڤرۆ نیوز، مەحمود نهێلی:
ل ژێر دروشمێ د هەمی کاودانانا دا ئەم ژیانێ د بەخشین رێخراوا ڤەژەن ب هەڤکاری ل گەل رێڤەبەریا ساخلەمیا قەزا ئامێدیێ رابووینە ب ئەنجامدانا هەوەکا مەزن یا خووین بەخشینێ ل سەرانسەرێ قەزا ئامێدیێ کو دێ بو ماوێ پتر ژ 10 رۆژان یا بەردەوام بیت.
دکتور نەجیب رێڤەبەرێ ساخلەمیا قەزا ئامێدیێ بو ئەڤرۆ نیۆز دیار کر ، کو ئەڤ هەوە وەک ئەرکەکێ مرۆڤایەتی و نیشتمانی ب خوەبەخشانە ژلایێ رێخراوا ڤەژەن ب هەڤکاری ل گەل رێڤەبەریا ساخلەمیا قەزا ئامێدیێ ڤە دهێتە ئەنجامدان و گۆت؛ دەسپێکێ رۆژا ئێک شەمبی ل نەخوشخانا ئامێدیێ ئەڤێ هەوێ دەست پێکر و نێزیکی50 بوتلێن خوونێ هاتنە بەخشین و پترین ژوان هاتنە شاندن بو ساخلەمیا دهوکی.
هەروەسا ناڤبری دیارکر، کو ئەڤ هەوە دێ یا بەردەوام بیت تا چەند رۆژێن بهێن و ئەڤرۆ رۆژا سێ شەمبی 6/3/2018 ل بنگەهێ ساخلەمیا دێرەلۆکی بوو و هەروەسا ل رۆژا 8/3/2018 دێ ل بنکەهێ ساخلەمیا شێلادزێ بیت ل رۆژا 10/3/2018 دێ ل بنگەهێ ساخلەمیا گارە ل سەرسنکێ بیت و ل رۆژا 12/3/2018 دێ ل نەخوشخانا روزانا ل کانی ماسێ بیت و ل رۆژا 15/3/2018 دێ ل بنگەهێ ساخلەمیا چەمانکی بیت و ل رۆژا 17/3/2018 دێ ل بنگەهێ ساخلەمیا بامەرنێ بیت.
ناڤبری هیڤی ژی خواستن کو د ڤێ هەوێ دا بشێن رێژەکا باش یا خووینێ کوم بکەن و کەسانێن پێدڤی بشێن مفای ژێ وەربگرن.
هەروەسا دەست خوەشی ژی ل وان کەسان کر یێن بەشدار تێدا کری و یێن هاریکاری کری بۆ ئەنجامدانا ڤێ هەوێ و هیڤیا بەردەوامیێ بو خوەست.
