واشنتۆن: كوردستان دێ بیته ژێده‌ره‌كێ سه‌ره‌كیێ دابینكرنا غازێ بۆ ئه‌ورۆپا
ئه‌ڤرۆنیۆز، ئه‌یاد به‌روارى:
هنارتیێ تایبه‌تێ وه‌زاره‌تا ده‌رڤه‌یا ئه‌مریكی بۆ كاروبارێن وزا نێڤده‌وله‌تی راگه‌هاند، غازا سروشتی ب شێوه‌كێ مه‌زن یا ل هه‌رێما كوردستانێ هه‌ی و د شیاندایه مفا ژێ بهێته وه‌رگرتن بۆ دابینكرنا غازێ بۆ وه‌لاتێن ئه‌ورۆپی و وه‌لاتێن رۆژهه‌لاتا ناڤین.
ئامۆس هوشستن هنارتیێ تایبه‌تێ وه‌زاره‌تا ده‌رڤه‌یا ئه‌مریكی بۆ كاروبارێن وزا نێڤده‌وله‌تی د داخۆیانیه‌كا رۆژنامه‌ڤانیدا دیاركر” پێشبینی دهێته كرن رێژه‌كا مه‌زن یا غازا سروشتی ل هه‌رێما كوردستانێ هه‌بیت و دشیاندایه مفا ژێ بهێته وه‌رگرتن بۆ ده‌مه‌كێ درێژ و دێ بیته ئه‌گه‌ر ژی بۆ دابینكرنا ئاسایشا ئابووری ژ عیراقێ و هه‌تا وه‌لاتێن رۆژهه‌لاتا ده‌ریا ناڤه‌راست”.
هوشستنی گوت ژی” بۆچی كوردستان نابیته ژێده‌رێ دابینكرنا ئه‌ورۆپا ب رێژه‌یێن مه‌زن ژ غازێ ب رێیا توركیا، ب تایبه‌تی ژی یا دیاره كو رێژه‌یێن مه‌زن ژ غازا سروشتی ل هه‌رێما كوردستانێ هه‌یه”.
هنارتیێ ئه‌مریكی بۆ كاروبارێن وزێ خویاكر” واشنتون بزاڤێ دكه‌ت بۆ هه‌ڤكاریێ د ناڤبه‌را به‌غدا و حوكمه‌تا هه‌رێما كوردستانێ دا د پرسا دابه‌شكرنا داهاتێن په‌ترۆلێ” ئاشكرا كر ژی” ب رێڤه‌چوونا دانوستاندنان ل دۆر ڤێ پرسێ یا سسته”.
دهێته زانین ئێكه‌تیا ئه‌ورۆپی بزاڤا هه‌مه‌جۆركرنا ژێده‌رێن دابینكرنا وێ ب غازێ دكه‌ت كو نوكه پشت به‌ستنێ ب رووسیا دكه‌ت بۆ دابینكرنا سێكا پێدڤیێن خوه ژ غازێ كو نیڤا وێ رێژێ ب رێیا ئوكرانیا دهێت كو تووشی شه‌ڕه‌كێ ناڤخوه‌یی بوویه.
