وركشوپه‌كێ بۆ پێشخستنا خودانكرنا په له‌وه‌ران هاته ئه‌نجامدان
ئه‌ڤرۆنيوز:
ئه‌ڤرۆ سپێدێ 25-1-2018 ب ئاماده‌بونا ئيسماعیل محه‌مه‌د هاریكارێ پارێزگه‌رێ دهۆكێ بۆ كاروبارێن مروڤایه‌تی وبوتان محسن قایمقامێ قه‌زا زاخۆ وچه‌ند رێڤه‌به‌رێن ناحیا وبسپورێن چاندنێ وڤیته‌رنه‌ری ورێكخراوێن تایبه‌تمه‌ند وخودانێن پرۆژێن په‌له‌وه‌ران ، رێكخراوا (گۆڵ) یا ئیرله‌ندی وركشوپه‌كا تایبه‌ت بۆ گه‌نگه‌شه‌كرنا كارێ ب خودانكرنا په‌له‌وه‌ران ژلایێ ئاواره وخه‌لكێ خوجهێ ده‌ڤه‌رێن زاخۆوبه‌رده‌ره‌ش وسێمێلێ وشێخان وجهێن دی ڤه‌كر.
ل به‌راهیێ نوونه‌رێ رێكخراوا ناڤبری رۆهنكرن دانه سه‌ر ئارمانجا سازكرنا وركشوپێ وگوت”ئارمانج ئه‌وه گه‌نگه‌شه دناڤبه‌را به‌رهه‌ڤبوویان دا بهێنه كرن ل دور رێكێن ب خودانكرنا په‌له‌وه‌ران وئاسته‌نگێن دهێنه پێش وچاوانیا پێشئێخستنا وی كه‌رتى كو گه‌شه‌كرنێ بێخیته ئابوورێ ده‌ڤه‌رێ وده‌لیڤێن كاری ژی بۆ وه‌لاتیان بهێنه په‌یداكرن وخه‌لك مفایی ژێ وه‌رگریت وبه‌رهه‌ڤیا رێكخراوا (گۆڵ) یا ئیرله‌ندی دیاركر بۆ پشته‌ڤانیكرنا هه‌ر پێشنیار وبیروكه‌كێ كو بۆ ب خودانكرنا په‌له‌وه‌ران بهێته پێش ئێخستن.
پاش هاریكارێ پارێزگه‌رێ دهۆكێ بۆ كاروبارێن مروڤایه‌تی په‌یڤه‌ك خواند تێدا سوپاسیا رێكخراوا ناڤبری كر كو ڤان جۆره وركشوپان بۆ ته‌خێن جودا ڤه‌دكه‌ت ودیاركر كو پێدڤیه ژئه‌ڤرۆ وێڤه رێكخراوێن په‌یوه‌ندیدار ب ره‌نگه‌كێ پراكتیك ول جهێ كاری ڤێ پشته‌ڤانیێ ل خودانێن پرۆژێن په‌له‌وه‌ران یان پروژێن دی یێن چاندنێ بكه‌ن ورێكێن زانستی یێن سه‌رده‌میانه بهێنه بكارئینان بۆ وێ یه‌كێ كارتێكرنا قه‌یرانا دارایی وئابووری ل سه‌ر وان پرۆژان بهێته كێمكرن وپرۆژێن په‌له‌وه‌ران ویێن چاندنێ بهێنه پێش ئێخستن وده‌لیڤێن كاری ژی بۆ ده‌رچویێن كوليژا وخه‌لكێ شاره‌زا بهێنه دیتن وپشته‌ڤانیا پارێزگه‌ها دهۆكێ نیشان دا بۆ ڤه‌كرنا ڤان وركشوپان وسه‌ركه‌فتن بۆ پشكداران خواست.
پاش ئارمانج وبه‌رنامێن وركشوپێ ژلایێ بسپوره‌كێ رێكخراوا (گۆڵ) یا ئیرله‌ندی هاتنه به‌رچاڤكرن ود ودوڤدا گه‌نگه‌شه ژلایێ پشكدارێن وركشوپێ هاتنه كرن.
