وه‌زاره‌تا ئه‌وقافێ ل دۆر دياركرنا رۆژا جه‌ژنێ رۆهنكرنه‌كێ دده‌ت
ئه‌ڤرۆنيوز:
وه‌زاره‌تا ئه‌وقافێ وكاروبارين ئايينى ل هه‌رێما كوردستانێ ل دۆر دياركرنا رۆژا ئێكێ ژ جه‌ژنا ره‌مه‌زانا پيرۆز په‌يامه‌كێ به‌لاڤ دكه‌ت وئاماژێ ب وێ دده‌ت، هه‌كه ل هه‌رێما كوردستانێ هه‌يڤ هاته ديتن، دێ بيته جه‌ژن وچاڤه‌رێ چو وه‌لاته‌كى ناهێته كرن، په‌يڤدارێ وه‌زاره‌تا ناڤبرى دياركر ل ئێڤاريا 14 ڤێ هه‌يڤێ دێ بريارا دووماهيێ هێته دان وخوياكر ئاماژه بۆ وێ چه‌ندێ دچن كو رۆژا ئه‌ينى دێ بيته رۆژا ئێكێ يا جه‌ژنێ.
نه‌به‌ز ئيسماعيل، په‌يڤدارێ وه‌زاره‌تا ئه‌وقافێ وكاروبارێن ئايينى بۆ SNN گۆت” لژنا ديتنا هه‌يڤێ ل هه‌رێما كوردستانێ ب مه‌ره‌ما دياركرنا رۆژا ئيكێ ژ جه‌ژنێ دێ كۆم بيت وژبلى وێ چه‌ندێ ژى ول دووڤ پێشبينيان رۆژا ئه‌ينيێ دێ رۆژا ئێكێ ژ جه‌ژنا ره‌مه‌زانا پيرۆز بيت كو دكه‌ڤيته 15/6/2018، به‌لێ پێدڤيه هه‌يڤ بهێته ديتن وهه‌كه هاته ديتن دێ بيته جه‌ژن”.
دياركر ژى” وه‌كو هه‌رێما كوردستانێ مه هه‌ماهه‌نگى يا هه‌ى ل گه‌ل ديوانا وه‌قفێ سونى ل عيراقێ وژبلى وێ چه‌ندێ ژى دياركرنا رۆژا ئێكێ ژ جه‌ژنێ دێ ب هه‌ماهه‌نگى بيت ل گه‌ل ديوانا وه‌قفێ سونى وسعوديێ”.
په‌يڤدارێ وه‌زاره‌تا ئه‌وقافێ گۆت” تيمێن مه ل هه‌موو باژێر وباژێركێن هه‌رێمێ ل ئێڤاريا رۆژا 14/6/2018 دێ دئاماده‌باشيێ دابن وهه‌ر ده‌مێ هه‌يڤ بهێته ديتن، دێ بيته جه‌ژن، داخوازێ ژ وه‌لاتيان ژى دكه‌ين هه‌كه هه‌يڤ ل ئێڤاريا هه‌مان رۆژ ببينن، مه ئاگه‌هدار بكه‌ن”.
ئاشكراكر ژى” ئه‌م وه‌كو هه‌رێما كوردستانێ چاڤه‌رێ چو وه‌لات ولايه‌نه‌كى ناكه‌ين، هه‌كه هه‌يڤ هاته ديتن، پشت راست بن دێ بيته جه‌ژن، به‌لێ ل دۆر وێ چه‌ندێ دێ هه‌ماهه‌نگى ل گه‌ل عيراقێ وهه‌موو وه‌لاتێن دى ژى كه‌ين”.