وه‌زاره‌تا به‌ره‌ڤانیێ یا ئه‌مریكا: ئه‌م هێزێن خوه ژ باكورێ سووریێ ڤه‌ناكێشین
ب، سه‌رجان مه‌حمود:
ئه‌نتۆن سیمیلرۆتی په‌یڤدارێ وه‌زاره‌تا به‌ره‌ڤانیێ یا ئه‌مریكا د داخۆیانیه‌كێ دا بۆ ده‌زگه‌هێن راگه‌هاندنا ئه‌مریكا دیار كر كو ره‌وشا عیراقێ، ئه‌فغانستانێ و سووریێ ژ هه‌ڤدو جودانه و ل سووریێ ڤه‌كێشانا هێزێن سه‌ربازی د رۆژه‌ڤێ دا نینه و گۆت: (ل سووریێ شه‌رێ ناڤخوه‌یی ب دووماهی نه‌هاتیه و ئالۆزی به‌رده‌وامن و د هه‌مان ده‌می دا گه‌فێن داعشێ ژی هه‌تا نها ب دژواری به‌رده‌وام دكه‌ن و بۆ ڤێ چه‌ندێ د ره‌وشا نها دا هێزێن مه ژ رۆژئاڤا ئانكۆ باكور و رۆژهه‌لاتێ سووریێ دمینن و هه‌ڤكاری و هاریكاریێن بۆ كوردێن رۆژئاڤا و رێڤه‌به‌ریا خوه‌سه‌ر دێ به‌رده‌وام بن).
ناڤهاتی هه‌روه‌سا راگه‌هاند ژی ل باكور و رۆژهه‌لاتێ سووریێ هژماره‌ك زێده ناڤه‌ندێن وان یێن سه‌ربازی هه‌نه و ل گه‌ل هه‌ڤپه‌یمانیا نێڤده‌وله‌تی پێكڤه كار دكه‌ن و وان دڤێت هه‌تا ره‌وشا ناڤخوه‌یی یا سووریێ ب ته‌مامی ئارام نه‌بیت ل باكورێ سووریێ بمینن و گۆت: (هه‌ڤپه‌یمانێ مه یێ سه‌ر ئه‌ردی ل سووریێ هێزێن سووریا دیموكرات و رێڤه‌به‌ریا خوه‌سه‌رن و د چارچۆڤێ نه‌خشێ دارێتی دا ل گه‌ل هێزێن سووریا دیموكرات شه‌رێ ل دژی داعشێ برێڤه دبه‌ین و ل ئالیه‌كێ ژی هه‌ول دده‌ین زێده‌تر رێیێن گه‌هاندنا هاریكاریێن مرۆڤی دروست بكه‌ین و بۆ ڤێ یه‌كێ كار و خه‌باتێن مه ل گه‌ل هه‌ڤپه‌یمانێن مه ب سه‌ركه‌ڤتی برێڤه دچن).
هه‌ر د ڤێ مژارێ دا واین مارۆتۆ فه‌رماندارێ هێزێن هه‌ڤپشك یێ ئه‌مریكا ژی راگه‌هاند كو د ره‌وشا نها دا هێزێن وان ل سووریێ و عیراقێ هه‌نه و ل عیراقێ ل سه‌ر داخوازا حوكمه‌تا عیراقێ بریار داینه هێزێن خوه كێم بكه‌ن و پشكه‌ك ژ هێزێن خوه ژی ڤه‌كێشن و گۆت: (ل عیراقێ سیسته‌مێ پێكڤه كاركرنا هێزێن مه و پێشمه‌رگێن كوردستانێ و هێزێن عیراقێ ل دژی تیرۆرستێن داعشێ ب سه‌ركه‌ڤتی برێڤه دچیت و بریارا ڤه‌كێشانا هێزێن مه ل عیراقێ ل سه‌ر داخواز و پێشنیازا حوكمه‌تا عیراقێ بوویه و بۆ ڤێ چه‌ندێ ره‌وشا عیراقێ و سووریێ ژێك جودانه و ل سووریێ ئه‌ركێن هێزێن مه ب دووماهی نه‌هاتینه و ئه‌م دخوازین ل سووریێ د ناڤبه‌را ئالیان دا دیالۆگ بهێته ده‌ستپێكرن و بنپێكرنێن مافێن مرۆڤی ژ ئالیێ رژیما ئه‌سه‌دی ڤه نه‌مینن و د هه‌مان ده‌می دا ده‌ستێوه‌ردانێن ل سووریێ ژی ژ هۆلێ رابن، وه‌كو خاله‌كا دی ژی هه‌بوونا مه ل رۆژئاڤا ئانكۆ باكور و رۆژهه‌لاتێ سووریێ به‌رده‌وامه و ل گه‌ل هێزێن سووریا دیموكرات شه‌رێ مه ل دژی داعشێ به‌رده‌وام دكه‌ت، ره‌وشا سووریێ ژی گه‌له‌ك ئالۆزه و پێدڤیا هه‌ڤپه‌یمانێن مه ل سووریێ ب هاریكاریا مه هه‌یه، ژ به‌ر هندێ ژی جارێ د رۆژه‌ڤا مه دا نینه كو هێزێن خوه ژ باكورێ سووریێ ڤه‌كێشین).
