وه‌زاره‌تا خواندنا بلند ليستا زانكۆيێن باوه‌رپێكرى يێن توركى وئيرانى به‌لاڤ دكه‌ت
ئه‌ڤرۆنيوز:
وه‌زاره‌تا خواندنا بلند وڤه‌كۆلينێن زانستى ل هه‌رێما كوردستانێ، پێداچوون ب ليستێن زانكۆيێن باوه‌رپێكرى يێن توركى وئيرانى كر وليسته‌كا نوو به‌لاڤكر.
وه‌زاره‌تا خواندنا بلند د مالپه‌رێ خوه يێ فه‌رمى دا به‌لاڤكر” وه‌زاره‌تا خواندنا بلند ل به‌رچاڤ وه‌رگرتنا ستاندار وپيڤه‌رێن جيهانى ورێزبه‌ندێن جيهانى يێن زانكۆيان، پێداچوون دليستا زانكۆيێن وه‌لاتێن توركيا وئيرانێ دليستا زانكۆيێن باوه‌رپێكرى ل هه‌رێما كوردستانێ كر ودئه‌نجامدا 41 زانكۆ ل توركيا و29 زانكۆ ل ئيرانێ هاتنه ده‌ستنيشانكرن بۆ بۆ وان قوتابيێن هه‌رێما كوردستانێ كو دخوازن ل وان هه‌ردو وه‌لاتان درێژيێ ب خواندنا خوه بده‌ن”.
وه‌زاره‌تا خواندنا بلند دياركر ژى” ئارمانج ژ پێداچوونێ ب ليستا زانكۆيێن باوه‌رپێكرى يێن توركيا وئيرانێ ل به‌رچاڤ وه‌رگرتنا كوالێتى وبنه‌ما وپيڤه‌رێن زانستى وخواندنێ وده‌سته‌به‌ركرنا پيڤه‌رێن جيهانى ل وان زانكۆيێن كو ل سه‌ر ئاستێ جيهانێ ل به‌راهيێ نه، ئه‌وژى دێ بيته ئه‌گه‌رێ بلندكرنا ئاستێ زانستيێ قوتابيان، كو ب مه‌ره‌ما دريژه پێدانێ ب خواندنێ ل ده‌رڤه‌ى وه‌لاتى سه‌ره‌دانا زانكۆيێن وان هه‌ردو وه‌لاتان دكه‌ن”.
وه‌زاره‌تا ناڤبرى ئاماژه دا” ژنوكه وپێڤه بۆ سالا خواندنێ (2018 -2019) هه‌ر قوتابيه‌ك ل كوردستانێ كو بخوازيت ل وان هه‌ردو وه‌لاتان درێژيێ ب خواندنێ بده‌ت، پێدڤيه ل ئێك ژ ڤان زانكۆيان بخوينيت كو دڤان ليستان دا ناڤێن وان هاتيه، به‌روڤاژى كار ب ليستێن پێشتر ناهێته كرن”.