وه‌زاره‌تا دارايى برياره‌كا نوو بۆ ڤان فه‌رمانبه‌ران ده‌ركر
ئه‌ڤرۆنيوز:
وه‌زاره‌تا دارايى وئابوورى ل هه‌رێما كوردستانێ دبرياره‌كێ دا كو به‌رى دو رۆژان هاتيه ده‌ركرن، چه‌ند مه‌رجان بۆ نووكرنا گرێبه‌ستێن فه‌رمانبه‌ران بۆ سالا 2018 دياردكه‌ت.
ل دووڤ نڤيسارا فه‌رمى يا وه‌زاره‌تا دارايى وئابوورى يا هژمار 89 ل رۆژا 8/1/2018، نووكرنا گرێبه‌ستا فه‌رمانبه‌رێن وه‌زاره‌ت وفه‌رمانگه‌هان ل 2018، دێ ل دووڤ پێدڤى وب رازيبوونا رێڤه‌به‌ريا گشتى يا بودجه‌ى ل وه‌زاره‌تا دارايى بيت ودێ ژ بودجا ئاسايى بيت.
هه‌ر د وێ نڤيسارێ دا هاتيه كو نابيت ژيێ فه‌رمانبه‌رێ گريبه‌ست دبن 18 ساليێ دابيت ونووكرنا گرێبه‌ستێ دێ ل دووڤ هه‌مان باوه‌رنامێ بيت ئه‌وا گرێبه‌ست ل به‌ر وێ هاتيه دروستكرن وكار ب چو باوه‌رنامێن دى ناهێته كرن.
ديسا تێدا ئاماژه هاتيه كرن، ژبه‌ركو دامه‌زراندنا فه‌رمانبه‌رێن گرێبه‌ست ل دووڤ بسپۆريێ وپێدڤيا فه‌رمانگه‌هان هاتيه كرن، له‌وما نابيت گورانكارى دناڤه‌نيشانێن وان يێن وه‌زيفى دا بهێته كرن ودحاله‌تێ پێدڤى نه‌بوونا فه‌رمانبه‌رى ب وى ناڤونيشانى، دشيان دايه گرێبه‌ست بهێته هه‌لوه‌شاندن.
وه‌زاره‌تا دارايى دياركريه ژى كو نابيت ڤه‌گۆهاستنا راژه‌ى بۆ چ فه‌رمانبه‌ره‌كێ گرێبه‌ست بهێته كرن، ژبلى وان فه‌رمانبه‌رێن ژن يێن ژيانا هه‌ڤژينيێ پێك دئينن، ئه‌و ژى ب رازيبوونا هه‌ردو فه‌رمانگه‌هێن لێ دهێته ڤه‌گۆهاستن، يان فه‌رمانگه‌ها بۆ دهێته ڤه‌گۆهاستن ب رازيبوونا رێڤه‌به‌ريا گشتى يا بودجه‌ى ل وه‌زاره‌تا دارايى وئابوورى.
ل دۆر وان فه‌رمانبه‌رێن گرێبه‌ست ئه‌وێن ل سه‌ر داهاتيێ ناڤخوه‌يى يێ وه‌زاره‌تان هايتنه دامه‌زراندن، گرێبه‌ستێن وان دێ بۆ هێنه نووكرن ژلايێ رێڤه‌به‌ريا گشتى يا ژمێركاريێ يا سه‌ر ب وه‌زاره‌تا دارايى ڤه، رێڤه‌به‌ريا خه‌رجيێن وه‌زاره‌تا دارايى رازيبوونێ دێ ل سه‌ر ده‌ت وناڤێن وان ب ليسته‌كێ بۆ ديوانا وه‌زاره‌تا دارايى دێ هێنه بلندكرن.
ئه‌و بريارا نوو يا وه‌زاره‌تا دارايى وئابوورى دێ ژ 1/1/2018 هێته بجهئينان.
