وه‌زاره‌تا سامانێن سرۆشتى رۆهنكرنه‌كێ ل دۆر په‌ترۆلا شێخان دده‌ت
ئه‌ڤرۆنيوز:
وه‌زاره‌تا سامانێن سروشتى ل هه‌رێما كوردستانێ، ل دۆر داخۆيانيێن دو په‌رله‌مانتارێن كوردستانێ رۆهنكرنه‌كێ دده‌ت وره‌ت دكه‌ت وه‌زاره‌تێ په‌ترۆلا خام يا كێلگا شێخان يا په‌ترۆلى ب 18 دۆلاران فرۆشت بيت.
ئه‌ڤرۆ رۆژا ئه‌ينى 8/12/2017، وه‌زاره‌تا سامانێن سروشتى ل هه‌ريما كوردستانێ رۆهنكرنه‌ك ل دۆر داخۆيانيێن هه‌ردو په‌رله‌مانتاران(عه‌لى حه‌مه سالح وشێركو جه‌وده‌ت) به‌لاڤكر، كو وان راگه‌هاندبوو” بهايێ هه‌ر به‌رميله‌كا په‌ترۆلا خام يا كيلگا شێخان تنێ ب 18 دۆلاران ژلايێ وه‌زاره‌تا سامانێن سروشتى ڤه هاتيه فرۆشتن”. وه‌زاره‌تا سامانێن سروشتى ژى رادگه‌هينيت” ئه‌و داخۆيانيه يا دووره ژراستيێ وب شێوه‌كێ بێ بنه‌ما هاتيه به‌حسكرن”.
دوێ رۆهنكرنا وه‌زاره‌تا سامانێن سروشتى هاتيه” ئه‌م وه‌كو وه‌زاره‌تا سامانێن سروشتى، ڤى ده‌نگوباسى ره‌ت دكه‌ين، ل دووڤ فه‌رمانا وه‌زارى يا هژمار 6884 ل 5/12/2017، ئه‌ڤ په‌ترۆله ب بهايێ(برێنت – 18) دۆلار هاتيه فرۆشتن، ئانكو بهايێ برێنت چه‌ند بيت ب 18 دۆلاران كێمتر، بۆ نموونه هه‌كه بهايێ برێنت ل بازارێن جيهانێ 63 دۆلار بيت، ئانكو ب 45 دۆلاران يا هاتيه فرۆشتن، كو ئه‌ڤ بهايه دبه‌رژه‌وه‌نديا حوكمه‌تا هه‌رێما كوردستانێ دايه وژبه‌ركو كوالێتيا په‌ترۆلا خام يا گرانه وكبريت يا تێدا، هه‌روه‌سا مه‌زاختيێن ڤه‌گۆهاستنێ بۆ هنارتنێ بۆ ده‌رڤه‌ى وه‌لاتى ژى ڤى بهاى ناكه‌ت، به‌لكو ل به‌نده‌رێ جه‌يهان ژى(برێنت -20) دۆلاره، ئانكو بۆ مه 2 دۆلار باشتره، هه‌ر ژبه‌ر ڤێ چه‌ندێ ژى بكرێن ناڤخوه‌يى ب شێوێ قه‌رزێ كاش يا وه‌رگرتى وكۆمپانيا به‌رهه‌مئێنه‌ر ژى يا ئاگاهداره”.
وه‌زاره‌تا سامانێن سروشتى، د وێ رۆهنكرنا خوه دا دبێژيت” باشتر بوو وان هه‌ردو په‌رله‌مانتاران پرسيار ژوه‌زاره‌تێ كربا تاكو به‌رسڤه بده‌ست كه‌فتبا، نه‌كو تنێ مه‌ره‌م پێ ئاژاوه‌گيرى وسه‌ركێژيا وه‌لاتيان بيت كو مخابن هێشتا دبه‌رده‌وامن ل سه‌ر وان ره‌فتارين خوه دڤێ قه‌يرانێ دا، كو دمه‌ره‌ما نڤيسينێن مه تێناگه‌هن ونه‌ڤێن تێبگه‌هن وب شێوه‌كێ شاش به‌لاڤ دكه‌ن”.
كۆمپانيا په‌ترۆلى(كۆلف كليستۆن) ل كێلگا په‌ترۆلى يا شێخان كار دكه‌ت، په‌ترۆلا شێخان يا گرانه وب تێكهه‌لكرنا وێ ل گه‌ل په‌ترۆلا كێلگێن دى كو ب بۆريان دهێته هنارتن، كوالێتيا په‌ترۆلا هه‌رێما كوردستانێ دهێته خوار، ژبه‌ر وێ چه‌ندێ بربار هاتيه دان ب جودا بهێته فرۆشتن.
