وه‌زاره‌تا پێشمه‌رگه: دڤێت لژنه‌كا ڤه‌كۆلینێ ل دۆر پرسا سڤكاتیا حه‌شدا شه‌عبی ب پێشمه‌رگه‌كی بهێته پێكئینان
ئه‌ڤرۆ:
وه‌زاره‌تا پێشمه‌رگه ل حوكمه‌تا هه‌رێما كوردستانێ ل سه‌ر پرسا وی پێشمه‌رگێ ژ ئالیێ مه‌فره‌زه‌كا حه‌شدا شه‌عبی هاتیه ئه‌شكه‌نجه‌دان و سڤكاتی پێ هاتیه كرن، هاته ده‌نگ.
وه‌زاره‌تا پێشمه‌رگه د به‌یاننامه‌كێ دا به‌لاڤكر” د روودانه‌كا نه خوازراودا، مه‌فره‌زه‌كا حه‌شدا شه‌عبی، هێرشی پێشمه‌رگێ لیوا نه‌هێ یا په‌یاده (ئه‌یمه‌ن عه‌بدی جاسم) یا سه‌ر ب وه‌زاره‌تا پێشمه‌رگه كر”.
د وێ به‌یاننامێ دا ئه‌وژی هاته به‌رچاڤكرن” دوور ژ هه‌موو عورف و قانوونان، ڤێ مه‌فره‌زا حه‌شدا شه‌عبی گه‌له‌ك ب شێوه‌كێ نه‌شرین سڤكاتی ب وی پێشمه‌رگه‌ی كر و كارێ نه هه‌ژی ل به‌رامبه‌ر ئه‌نجامدا”.
به‌لاڤكر ژی” ئه‌ڤ كاره جهێ قبوولكرنێ نینه، داخوازێ ژ هێزێن ئه‌منی یێن كه‌ركووكێ دكه‌ین، لژنه‌كا ڤه‌كۆلینێ ل سه‌ر ڤێ پرسێ بهێته پێكئینان و تۆمه‌تبار بهێنه ده‌سته‌سه‌ركرن و روو ب روویێ قانوونێ بكه‌ن، بۆ وێ چه‌ندێ هیچ كه‌س و ئالیه‌كێ دی بزاڤێ نه‌كه‌ت ڤی جۆره كارێ نه هه‌ژی ووباره بكه‌ت” .
ژ ئالیێ خوه‌ڤه، كه‌مال كه‌ركووكێ سه‌رۆكێ جڤاتا سه‌ركردایه‌تیا كه‌ركووك – گه‌رمیان یا پارتی دیموكراتی كوردستان، سه‌باره‌ت ڤێ پرسێ به‌یاننامه‌ك به‌لاڤكر و تێدا راگه‌هاند، چ جاران قبوول ناكه‌ین ده‌ستدرێژی ل سه‌ر كه‌رامه‌ت و مرۆڤایه‌تیا پێشمه‌رگه‌كی یان وه‌لاتیه‌كێ كوردستانێ ژ هه‌ر نه‌ته‌وه و مه‌زهه‌ب و ئاراسته‌كێ كه‌لتووری بیت، بهێته كرن.
د وێ به‌یاننامێ دا هاتیه، وه‌زاره‌تا پێشمه‌رگه ل حوكمه‌تا هه‌رێما كوردستانێ، د به‌یاننامه‌كێ دا به‌لاڤكر سه‌باره‌ت ده‌ستدرێژیكرنا ده‌سته‌یه‌كا وه‌حشی یا سه‌ر ب ئێك ژ یه‌كه‌یێن حه‌شدا شه‌عبی بۆ سه‌ر پێشمه‌رگه‌كێ لیوا نه‌هێ یا په‌یاده سه‌ر ب وه‌زاره‌تا پێشمه‌رگه ڤه ب ناڤێ (ئه‌یمه‌ن عه‌بدی جاسم) ژ پێكهاتێ كاكه‌یی. د ده‌مێ پیداچوونا هوور بۆ هوورده‌كاریێن ڤێ تاوانێ، بۆمه دیاربوو كه‌سانێن ئه‌نجامده‌رێن ڤێ تاوانێ د دوورن ژ هه‌موو به‌هایێن مرۆڤایه‌تی و ره‌وشتی، نوونه‌رایه‌تیا وی ره‌وتی دكه‌ن كو بوویه ئێك ژ سیمایێن روودانان ل ئیراقێ و ئه‌ڤ كارێ شه‌رمزارانه به‌لگه‌كێ حاشا هه‌لنه‌گره ل سه‌ر نزمیا ئاستێ وان كه‌سێن خوه تێكهه‌لی كونجێن جوراوجۆرێن سیسته‌مێ له‌شكری و ئه‌منی ل ئیراقێ كری.
كه‌مال كه‌ركووكێ ئاماژه‌كر” ئه‌م ل هه‌رێما كوردستانێ و ل ده‌زگه‌هێن حوكمه‌تێ و ئایینی و جڤاكی د بزاڤێن چه‌سپاندن و جهگیركرنا پێكڤه‌یانا ئاشتیانه و رێزگرتن ل كه‌لتوور و ئایین و نه‌ته‌وێن جۆراوجۆرین و ب هه‌موو رێیه‌كا ل به‌رده‌ست مه كاركریه بۆ چه‌سپاندنا ڤی ره‌وشتێ مرۆڤانه د ناڤ رێزێن هێزێن پێشمه‌رگێ قه‌هره‌مان دا و شانازیێ ب وێ چه‌ندێ دكه‌ین كو هێزێن مه سه‌ره‌رای ده‌م و ره‌وشێن دژوار، رۆژه‌كێ ژ رۆژان ئه‌ڤ شێوازێن وه‌حشیانه بكارنه‌ئیناینه، د به‌رامبه‌ر دا چ جاران قه‌بوول ناكه‌ین ده‌ستدرێژی بهێته كرن ل سه‌ر كه‌رامه‌ت و مرۆڤایه‌تیا پێشمه‌رگه‌كی یان وه‌لاتیه‌كێ كوردستانی ژ هه‌ر نه‌ته‌وه و مه‌زهه‌ب و ئاراسته‌كێ كولتووری بیت”.
دیاركر ژی” له‌ما پێدڤیه وه‌زاره‌تا به‌رگریا ئیراقێ و ده‌سته‌یا حه‌شدا شه‌عبی و ده‌زگه‌هین جودا جودا یێن سیسته‌مێ ئه‌منی ل ئیراقێ ژبه‌ر مه‌ترسیا ڤێ ره‌فتارێ و دارمانا مه‌زن یا ره‌وشتی كارمه‌ندێن ئه‌منی بگرن ب تایبه‌تی ئه‌و گرۆپێن خوه تیكهه‌لی ده‌زگه‌هێن له‌شكری یێن ئیراقی كری و بووینه مه‌ترسیا راسته‌قینه ل سه‌ر بهایێن جڤاكی و پێگه‌هێ كارمه‌ندێن ده‌زگه‌هێن ئه‌منی و له‌شكری د ناڤ رۆلێن گه‌لی”.
ل دووماهیێ دبێژیت” د هه‌مان چارچۆڤه‌ی دا، پێدڤیه ده‌سته‌یا حه‌شدا شه‌عبی وێ كۆمێ راده‌ستی دادگه‌هێ بكه‌ت و شكۆیا وی پێشمه‌رگه‌ی و پێكهاتێ كاكه‌یی بزڤرینیت، كو پێكهاته‌كێ خودان دیرۆك و كولتوور و شارستانیه‌ته‌كا ره‌سه‌نه”.
ژ ئالیێ خوه‌ڤه شاخه‌وان عه‌بدوللا، جێگرێ سه‌رۆكێ جڤاتا نوونه‌رێن ئیراقێ ل سه‌ر دۆسێیا ئه‌شكه‌نجه‌دان و سڤكاتیكرنێ ب پێشمه‌رگه‌كێ كاكه‌یی، راگه‌هاند” پشتی ده‌نگوباسێ سڤكاتیكرنێ ب پێشمه‌رگه (ئه‌یمه‌ن عه‌بدی) گه‌هشتیه من، ئێكسه‌ر من مسته‌فا كازنی سه‌رۆك وه‌زیرێن ئیراقێ ب ڤێ روودانێ ئه‌گه‌هداركر”.
گۆت ژی” ل گه‌ل سه‌رۆكێ لژنا ئاسایش و به‌رگریێ ل جڤاتا نوونه‌رێن ئیراقێ ئاخڤتم و دێ ڤه‌كۆلین د وێ روودانێ دا هێته كرن و ژ هیچ كه‌س و ئالیه‌كی ناهێته قبوولكرن ده‌ستدرێژیێ بكه‌ته سه‌ر وه‌لاتیان، چ ژ برایێن كاكه‌یی بیت یان هه‌ر مه‌زهه‌به‌كی دی بیت”.
