وه‌زاره‌تا چاندنێ دێ زه‌ڤيان ده‌ته ده‌رچوويێن كۆليژێن چاندنێ
ئه‌ڤرۆ نيوز:
وه‌زاره‌تا چاندنێ و ژێده‌رێن ئاڤێ ل هه‌رێما كوردستانێ بۆ ڤه‌ژاندنا كه‌رتێ چاندنێ وپه‌يداكرنا ده‌ليڤێن كارى، دێ زه‌ڤيێن چاندنێ يێن وه‌زاره‌تێ ده‌ته ده‌رچوويێن كۆليژێن چاندنێ كو ل دووڤ بسپۆريێن خوه كارى تێدا بكه‌ن.
بێگه‌رد تاله‌بانى، وه‌زيرا چاندنێ و ژێده‌رێن ئاڤێ ل هه‌رێما كوردستانێ راگه‌هاند” مه ل وه‌زاره‌تا چاندنێ چه‌ندين زه‌ڤيێن چاندنێ يێن هه‌ين و مه نه‌ڤێت ب جۆرێ نوكه بمينن، مه پرۆژه‌كێ ل به‌رده‌ست كو نوكه ل وه‌زاره‌تێ كار ل سه‌ر دكه‌ين بۆ وێ چه‌ندێ ميكانيزمه‌كێ دانين ئه‌و زه‌ڤيێن چاندنێ يێن مولكێ وه‌زاره‌تا چاندنێ ب شێوه‌كى بده‌ينه ده‌رچوويێن كۆليژێن چاندنێ تاكو كارى تێدا بكه‌ن، بۆ وێ چه‌ندێ هه‌م مفاى ژ به‌رهه‌مێن وان وه‌ربگرين وهه‌م مفاى ژ بسپۆريا وان ده‌رچوويان وه‌ربگرين بۆ ڤه‌ژاندنا كه‌رتێ چاندنێ”.
بيگه‌رد تاله‌بانى زێده‌تر بۆ رووداو گۆت” ڤى پرۆژه‌ى دو ئارمانج يێن هه‌ين، يا ئێكێ په‌يداكرنا ده‌ليڤێن كارى بۆ ده‌رچوويێن زانكۆيێ، يا دويێ ڤه‌ژاندن ومفا وه‌رگرتن ژ وان زه‌ڤيێن چاندنێ و پێشڤه‌برنا كه‌رتێ چاندنێ و زێده‌كرنا به‌رهه‌مێ ناڤخوه‌يى”.
ل دۆر شێوازێ دابينكرنا زه‌ڤيێن چاندنێ بۆ ده‌رچوويێن زانكۆيان و شێوازێ كاركرنێ و ميكانيزما مامه‌له‌كرنێ د گه‌لدا، وه‌زيرا چاندنێ دياركر” ل چه‌ند رۆژێن داهاتى جڤاتا راويژكاريا وه‌زاره‌تێ دێ كۆمبيت بۆ وێ چه‌ندێ ميكانيزما گونجاى دانين كا ب چ شێواز زه‌ڤيان ب ده‌رچوويان بده‌ين و چاوان كار تێدا بهێته كرن، كارى بۆ وێ چه‌ندێ ژى دێ كه‌ين كو پشتى كاركرنێ د وان زه‌ڤياندا، ميكانيزمه‌كێ دانين كو به‌رهه‌م بهێنه ساخكرن و هه‌ر ژ نوكه دێ بزاڤێ كه‌ين بازارى بۆ دابين بكه‌ين”.
