وه‌زيرێ ده‌رڤه‌يێ ئه‌مريكا په‌يوه‌نديێ ب نێچيرڤان بارزانى دكه‌ت
ئه‌ڤرۆنيۆز:
وه‌زيرێ ده‌رڤه‌يێ ئه‌مريكا دپه‌يوه‌نديه‌كا ته‌له‌فۆنى دا ل گه‌ل نيچيرڤان بارزانى سه‌رۆك وه‌زيرێن هه‌رێما كوردستانێ، دياركر كو ئه‌مريكا به‌غدا هاندده‌ت ده‌ليڤا ده‌ستپێكرنا دانوستاندنه‌كا جدى ل گه‌ل حوكمه‌تا هه‌رێما كوردستانێ په‌يدابكه‌ت، نيچيرڤان بارزانى ژى دياركر كو هه‌رێما كوردستانێ ل گه‌ل دانوستاندنه‌كا جدى يه وداخوازا راكرنا دۆرپێچا ل سه‌ر فرۆكخانێن هه‌رێمێ كر كو پشكه‌كا مه‌زن ژ هاريكاريان بۆ ئاواران ب رێيا وان فرۆكخانان دهێن.
سايتێ فه‌رميێ حوكمه‌تا هه‌رێما كوردستانێ به‌لاڤكريه كو ئه‌ڤرۆ شه‌مبيێ 18/11/2017 دپه‌يوه‌نديه‌كا ته‌له‌فۆنيدا ل گه‌ل نێچيرڤان بارزانى سه‌رۆك وه‌زيرێن هه‌رێما كوردستانێ، رێكس تيله‌رسۆن وه‌زيرێ ده‌رڤه‌يێ ئه‌مريكا خوه‌شحاليا خوه ب ئارامبوونا هێلێن دناڤبه‌را پێشمه‌رگه‌ى وهێزێن عيراقى دياركر ودان ب خوه‌داگرتنا هه‌ردولا بۆ پاراستنا ئاراميي ب بلند نرخاند، ديسا سه‌ره‌خوه‌شيا خوه ولاتێ خوه بۆ قوربانيێن بيڤه‌له‌رزا هه‌فتيا بۆرى هه‌رێما كوردستانێ ڤه‌گرتى وبه‌رهه‌ڤيا وه‌لاتێ خوه دياركر بۆ هه‌ر هاريكارى وهه‌ماهه‌نگيه‌كێ ل دۆر وێ پرسێ. هه‌روه‌سا ده‌ستخوه‌شى ل حوكمه‌تا هه‌رێما كوردستانێكر بۆ رێزگرتنێ ل شرۆڤا دادگه‌ها فيدرالى يا عيراقى ل دۆر دستوورى، دووپاتى ژى ل پاراستنا ئاراميێ كر ل پيناڤى رێخوه‌شكرنێ بۆ دانوستاندنه‌كا جدى دناڤبه‌را هه‌ولێرێ و به‌غدا ل سه‌ر بنه‌مايێ دستوورى.
سايتێ حوكمه‌تا هه‌رێمێ دياركر، ژلايێ خوه‌ڤه نێچيرڤان بارزانى دووپات كر كو هه‌رێما كوردستانێ وه‌كو به‌رده‌وام راگه‌هاندى يا به‌رهه‌ڤه بۆ دانوستاندنه‌كا جدى ل گه‌ل حوكمه‌تا فيدرالا عيراقێ وهه‌موو كێشه ل سه‌ر بنه‌مايێ دستوورى بهێنه چاره‌كرن، هه‌روه‌سا هيڤى خواست ئه‌مريكا وهه‌ڤپه‌يمانان رۆلێ خوه دده‌ستپێكرنا دانوستاندنێن هه‌ولێر وبه‌غدا بگيرن وهاريكار وپشته‌ڤان بن.
نێچيرڤان بارزانى سوپاسيا وێ په‌يوه‌نديا ته‌له‌فۆنى وسه‌ره‌خوه‌شيا تێله‌رسنى بۆ قوربانيێن بيڤه‌له‌رزا كر وئاماژه ب وێ چه‌ندێ دا كو پێشوازيێ ل هه‌ر هاريكاريه‌كێ دكه‌ن بۆ قوربانيێن بيڤه‌له‌رزێ، دووپاتى ل سه‌ر وێ چه‌ندێ كر كو پێدڤيه دۆرپێچا ل سه‌ر فرۆكخانێن هه‌رێما كوردستانێ بهێته راكرن، ب تايبه‌تى كو دبوارێ مرۆڤى دا پێدڤيه‌كا مه‌زن پێ هه‌يه، چونكى پشكه‌كا هاريكاريان بۆ زێده‌تر ژ مليۆن و 500 هزار ئاواره وپه‌نابه‌ران ل هه‌رێما كوردستانێ، ل رێيا فرۆكخانان دهێنه دابين كرن.