وه‌زيرێ كار وكاروبارێن جڤاكى به‌حسێ بزاڤا زێده‌كرنا مووچێن خودان پێدڤيێن تايبه‌ت دكه‌ت
وه‌زيرێ كار وكاروبارێن جڤاكێ ل هه‌رێما كوردستانێ بۆ ئه‌ڤرۆ نيۆز راگه‌هاند، بزاڤێ دكه‌ين مووچێن خودان پێدڤيێن تايبه‌ت وه‌كو به‌رێ لێ بكه‌ين.
محه‌مه‌د قادر هاوديانى وه‌زيرێ كار وكاروبارێن جڤاكى بۆ ئه‌ڤرۆ نيۆز گۆت، گه‌له‌ك كه‌س يێن هه‌ين كو مووچێن خودان پێدڤيێن تايبه‌ت وه‌ردگرن، به‌لێ دهه‌ژى وه‌رگرتنا وى مووچه‌ى نينن، ژبه‌ركو مه‌رجێن وه‌رگرتنا مووچه‌ى ژێ ناگرن، يان رێژا په‌ككه‌فتنا وى نه‌گه‌هشتيه وێ رێژا هاتيه دياركرن بۆ وه‌رگرتنا مووچێ خودان پێدڤيێن تايبه‌ت.
هاوديانى خوياكر ژى، پشتى ئه‌نجامدانا پشكنينێن تايبه‌ت يێن گرێداى ب ڤى بابه‌تى ڤه، دێ گه‌له‌ك كه‌س وناڤ ژليستا وه‌رگرتنا مووچێن خودان پێدڤيێن تايبه‌ت هێنه ده‌ركرن، چونكى مه‌رجێن پێدڤى ل ده‌ف وان نينن.
دياركر ژى، هه‌كه مووچێن خودان پێدڤيێن تايبه‌ت بهێنه زێده‌كرن ژى، دێ ب رێيا ميكانيزمه‌كێ بيت ئه‌وژى پشتى پاقژكرنا ليستا مووچه‌خۆرێن خودان پێدڤيێن تايبه‌ت ژ كه‌سێن نه‌هه‌ژى وه‌رگرتنا وى مووچه‌ى، كو ئه‌و مووچێن ژوان دهێنه برين دێ ل سه‌ر مووچێن هه‌ژى وه‌رگرتنێ هێنه زيده‌كرن وئه‌ڤه هه‌تا نوكه پرۆژه‌يه ل ده‌ف مه ودێ بلند كه‌ين.
ل دۆر هژمارا خودان پێدڤيێن تايبه‌ت ئه‌وێن دێ ناڤێن وان ژ ليستا وه‌رگرتنا مووچه‌ى هێنه ده‌ركرن، وه‌زيرێ كار و كاروبارێن جڤاكى گۆت، ئامار ل ده‌ف من نينن، به‌لێ هژمارا وان گه‌له‌كن.
دهێته زانين به‌رى قه‌يرانا دارايى هه‌ر خودان پێدڤيه‌كا تايبه‌ت گوژمێ 150هزار دينار وه‌ردگرتن، پشتى قه‌يرانا دارايى ب سه‌ر هه‌رێما كوردستانێ دا هاتى، ئه‌و گوژمه يێ هاتيه كێمكرن بۆ 90 هزار و60 هزار ديناران.
ل دووڤ داخۆيانيه‌كا به‌رێ يا وه‌زيرێ كار وكاروبارێن جڤاكى، ل هه‌رێما كوردستانێ ئه‌و ده‌ستهه‌لات ب وه‌زيرێ كار نه‌هاتيه دان كو مووچه‌ى بۆ خودان پێدڤيێن تايبه‌ت زێده بكه‌ت، به‌لێ ئه‌و ده‌ستهه‌لات يا پێ هاتيه دان پارێن وان كێم بكه‌ت، ل گه‌ل ئه‌ڤێ چه‌ندێ ژى وه‌زاره‌تا كار چو داهاته‌ك نينه، له‌وما نه‌شێت چو هاريكاريا مادى يا كێم ئه‌ندامان بكه‌ت.
ل دۆر پرۆسا پشكنينا كێم ئه‌ندامان، گۆت، پرۆسا پشكنينێ ل پتريا باژێرێن هه‌رێما كوردستانێ يا ب دووماهى هاتى، تنێ ل هه‌ردو ده‌ڤه‌رێن هه‌له‌بجه وگه‌رميان يا ماى وئه‌وێن پشكنين بۆ هاتيه ئه‌نجامدان ژى نوكه دداتا په‌يسا دا دهێنه تۆماركرن وپرۆسا يا دقۆناغێن دووماهيێ دا.
ئاماژه دا كو هه‌ر ژده‌ستپێكرنا پرۆسا ئه‌نجامدانا پشكنينان ل سه‌ر كێم ئه‌ندامان به‌رى سال ونيڤان، گه‌له‌ك كه‌س نه‌هاتينه بۆ ئه‌نجامدانا پشكنينان كو وان به‌رى نوكه مووچێن خودان پێدڤيێن تايبه‌ت وه‌ردگرتن، بێگومان ئه‌وژه ئه‌و كه‌سن كو هه‌ر ژده‌ستپێكێ خودان پێدڤيێن تايبه‌ت نه‌بوون ورێژا كێم ئه‌ندامه‌تيا وان گه‌له‌ك يا كێم بوو، له‌وما نه‌هاتينه بۆ ئه‌نجامدانا پشكنينان و ل دووماهيێ ژى دێ مووچێن وان كه‌سێن نه‌هين پشكنينان ئه‌نجام بده‌ن، هێنه برين.
