وه‌زيرێ چاندنێ: دخوازين قه‌رێن چاندنێ بهێنه زێده‌كرن
ئه‌ڤرۆ نيوز:
ئه‌ڤرۆ روونشتنه‌كا دى يا په‌رله‌مانێ كوردستانێ هاته ئه‌نجامدان كو يا تايبه‌ت بوو ب راستڤه‌كرنا سێ قانوونان د پشكا ئێكێ دا و پشكا دويێ ژى مێڤانكرنا وه‌زيرێ چاندنێ بوو ل حوكمه‌تا هه‌رێما كوردستانێ.
د ته‌وه‌رێ ئێكێ دا خواندنا ئێكێ بۆ راستڤه‌كرنا هه‌ر سێ قانوونێن كۆمسيۆنا كوردستانێ يا هه‌لبژارتنان پرۆژێ قانوونا خانه‌نشينكرنا كێم ئه‌ندامێن پێشمه‌رگه (زێره‌ڤانى هه‌رێما كوردستان – عيراق) ل گه‌ل راستڤه‌كرنا قانوونا راژه و خانه‌نشينا هێزێن ئاسايشا ناڤخۆ هاته كرن و بۆ لژنا قانوونى هاته ره‌وانه‌كرن.
د ته‌وه‌رێ دويێ دا وه‌زيرێ چاندن و ژێده‌رێن ئاڤێ ل حوكمه‌تا هه‌رێما كوردستانێ، عه‌بدولستار مه‌جيد قادر، په‌يڤه‌ك پێشكێش كر و د په‌يڤا خوه دا ل په‌رله‌مانێ كوردستانێ راگه‌هاند كو كارێ سه‌ره‌كى يێ وه‌زاره‌تا وان دابينكرنا ئاسايشا خوارن و ئاڤێ يه؛ ده‌رباره‌يى ئاسايشا خورانێ ژى پشتى سالا 1957 بۆ جارا ئێكێ يه به‌رهه‌مێ گه‌نمى بگه‌هيته 844 هزار ته‌نان و بۆ جارا ئێكێ يه ژى 113 هزار ته‌نێن پتاتان ل هه‌رێمێ بهێنه به‌رهه‌م ئينان و بهنێرنه ژ ده‌رڤه.
ئاماژه ب وێ چه‌ندێ ژى كر كو كوردستان خودانا 29 مليار مه‌ترێن سێجا يا ئاڤا سه‌ر ئه‌ردى يه و ژ وى كۆژمى ژى 18 مليار ژ ناڤخۆيه و ب گۆره‌يى داتايان 60% ژ ئاڤا هه‌رێمێ ب هه‌ڕوه دچيت د ده‌مه‌كى دا كو شه‌ره‌كێ ئاڤێ ل پێشيا كوردستانێ يه، بۆ نمۆنه توركيا دڤێت به‌نداڤا چێكه‌ت و ئيرانێ دڤێت رێيا ئاڤێ ب گوهۆڕيت.
وه‌زيرێ چاندنێ ئاماژه ب وێ چه‌ندێ ژى كر كو نوكه 10 به‌نداڤ تمام بووينه و كار ل سه‌ر حه‌فت به‌نداڤان ژى ب ره‌نگێ قه‌ر دهێته كرن و كارێ 24 به‌نداڤان ژى ژ نه‌بوونا پاره‌يى راوه‌ستيايه و گۆت: “هه‌كه پاره هه‌بيت دشيان دايه، دو جاران هندى پێدڤيا هه‌رێمێ ئاڤێ دابين بكه‌ين”.
هيڤى ژى خواست كو قه‌رزێ چاندنێ ژ 150 مليۆنان بۆ 500 مليۆنان بهێته زێده‌كرن و ماوێ دانێ ژى چار سالان ببيته 10 سال.