وه‌زیرێ ساخله‌میێ: ل نێزیك چه‌ندین پڕۆژه‌یێن ساخله‌میێ ل زاخۆ دێ هێنه راگه‌هاندن
زاخۆ، عه‌لی حاجی:
وه‌زیرێ ساخله‌میێ ل حوكمه‌تا هه‌رێما كوردستانێ دوهی سه‌ره‌دانا دا ئیداره‌یا سه‌ربخوه یا زاخۆ كر و راگه‌هاند: رێڤه‌به‌ریا ساخله‌میا زاخۆ ئێدی دێ بیته رێڤه‌به‌ریا گشتی و بڕیاره د ده‌مه‌كێ نێزیك دا چه‌ندین پڕۆژه‌یێن ساخله‌میێ ل ئیداره‌یا سه‌ربخوه یا زاخۆ بهێنه بجهئینان.
دكتور سامان به‌رزنجی، وه‌زیرێ ساخله‌میێ دكۆنفرانسه‌كێ رۆژنامه‌ڤانی دا گۆت: “د به‌رده‌وامیا پشته‌ڤانیكرنا حكومه‌تا هه‌رێما كوردستانێ دا بۆ كه‌رتێ ساخله‌میێ ل زاخۆ بڕیار هاتیه دان رێڤه‌به‌ریا ساخله‌میا زاخۆ ببیته رێڤه‌به‌ریا گشتی و دكتۆر سیروان نه‌جار وه‌كو رێڤه‌به‌رێ گشتیێ ساخله‌میا زاخۆ هاته دانان و ده‌ست ب كار بوو”.
ناڤهاتی گۆتژی: “هه‌ر ب ڤێ هه‌لكه‌فتێ رادگه‌هینین، بڕیاره د ده‌مه‌كێ نێزیك دا چه‌ندین پڕۆژه‌یێن ساخله‌میێ ل ئیداره‌یا سه‌ربخوه یا زاخۆ بهێنه راگه‌هاندن و دێ بیته ئه‌گه‌ر زێده‌تر خزمه‌تا خه‌لكێ ڤی باژێری بهێته كرن، ژ وان ژی: دروستكرنا نه‌خوشخانه‌یه‌كا سۆتنێ و ڤه‌كرنا پشكا چڕ و به‌رفره‌هكرنا نه‌خۆشخانا هه‌وارهاتنێ، دیسا دروستكرنا نه‌خۆشخانا گشتی یا باتیفا”.
وه‌زیرێ ساخله‌میێ ئاشكرا ژی كر، ئه‌و دێ به‌رده‌وام پشته‌ڤانیا كه‌رتێ ساخله‌میێ ل زاخۆ كه‌ن و باژێرێ زاخۆ ئێك ژ وان باژێران بوو كو حكومه‌تا هه‌رێما كوردستانێ ده‌رگه‌هێ دامه‌زراندنێ بۆ ڤه‌كری و ل دووڤ كارناما حكومه‌تا هه‌رێما كوردستانێ پێدڤیه كه‌رتێ ساخله‌میێ زێده‌تر بهێته پێشئێخستن.
