وه‌لاتيێن گونده‌كێ ئاكرێ ب شه‌ر چوون
ئه‌ڤرۆ نیوز، نه‌وزاد هلۆرى:
ژئه‌گه‌رێ دروستبوونا شه‌ر و ئالوزیان دناڤبه‌را وه‌لاتیێن گوندێ (باژێره) ل نێزیك ئاكرێ، زارۆیه‌كێ گوندێ (چه‌مه‌رزن) كو هه‌ڤسویێ گوندێ وایه، ب گرانى برینداربوو، ئه‌گه‌را برینداركرنا زاروكى ژى دزڤرین بۆ روودانا ل دهوكێ دروست بوى كو تێدا قوتابیه‌كێ رێزا 12ێ هاتیه برینداركرن.
كیڤى یه‌حیا، وه‌لاتیه‌كێ گوندێ (چه‌مه‌رزن) یێ سه‌ر ب ئاكرێ، بۆ ئه‌ڤرۆ نیوز گۆت: (ژ ئه‌گه‌رێ كێشا ل دهوكێ دروست بووى كو تێدا قوتابیه‌كێ رێزا 12ێ ئاماده‌یى هاتیه برینداركرن، ده‌مه‌كێ كێم شه‌ره ته‌قه ل گوندێ باژێره كو جهێ ئاكنجیا قوتابى یه، دروست بوو، د ئه‌نجام دا زارۆیه‌كێ گوندێ مه ب گرانى برینداربوویه).
زێده‌تر گۆت: (ناڤێ زاروكى هه‌رمان هه‌ڤاله و ژیێ وى شه‌ش سالن، ب گوله‌یه‌كێ هاتیه برینداركرن، ئه‌م دخوازین كو شه‌رێ وان ب زووترین ده‌م بهێته راگرتن ژبه‌ركو گوندێ مه كێمتر ژ كیلومه‌تره‌كێ ژ گوندێ وان دوره و گوله‌یێن وان دهێنه گوندێ مه و ترس ل ده‌ڤ خه‌لكى په‌یدا بویه).
ب گوره‌ى ئاخفتنێن ناڤبرى، شه‌رێ وان هه‌تا نوكه به‌رده‌وامه و ئه‌و دخوازن كو پولیس و ئاسایش و جهێن شوله‌ژێ ب زوترین ده‌م بهێنه دناڤ گوندێ وان دا و ئاریشا وان چاره‌سه‌ر بكه‌ن. دهێته زانین كو به‌رى سێ سالان كێشه‌كا جڤاكى دناڤبه‌را وه‌لاتیێن گوندێ باژێره دروست بوو و تێدا چه‌ند كه‌سه‌ك هاتبونه كوشتن، دوڤ دا ب رێیا عه‌شیره‌تگه‌ریێ سولحا وان هاتبویه كرن، ئه‌ڤرۆ هه‌ما كێشه هاته‌نوكرن ڤه.