وێنه‌يى: ل باکوورێ کوردستانێ ژ بەر شەری خەلکی مالێن خوە چولکرن
ئەڤرۆ نیوز:
شەرێ د ناڤبەرا PKK و دەولەتا تورکیا ل ناڤ باژێرێن باکورێ کوردستانێ و ل چیایێن کوردستانێ دا دژوارتر دبیت و د ناڤا ھەفتیەکی دا ١٤٩ سەرباز و پۆلیسێن تورکیا ھاتنە کوشتن و ١٧ گەریلایێ کورد ژی ژیانا خوە ژ دەست داینە و ٢١ وەلاتیێن سڤیل یێن کورد ژی ژ ئالیێ ھێزێن ئێمناھیێن دەولەتا تورکیا ڤە ھاتینە کوشتن و ھەژمارەک وەلاتی ژی بریندار بووینە.
ھەر چەندە ب دەھان سازیێن سڤیل و سیاسەتمەدار و رەوشەنبیرێن کورد و تورک داخوازا راوەستاندنا شەرێ د ناڤبەرا دەولەتا تورکیا و PKK دا دکەن د ھەمان دەمی دا حوکمەتا بەروەخت یا تورکیا و سەرۆک کۆمارێ تورکیا ل سەر دژوارکرنا شەری رژدیا خوە ددەن نیشادان و ل ھەمبەر دا PKK ژی راگەھاند کو ئەو دێ د ھەر وارێ ژیانێ دا بەرسڤا دەولەتا تورکیا بدەن و دێ ھێدی ھێدی دەست ب ئازادکرنا باژێرک و باژێرێن باکورێ کوردستانێ بکەن.
رەجەب تەیب ئەردۆگان سەرۆک کۆمارێ تورکیا ل باژێرێ ئەنقەرە یێ پایتەختا تورکیا بۆ دەزگەھێن راگەھاندنێن تورکیا راگەھاند کو ھەتا یەک ئەندامێن PKK ل ناڤ باژێر و چیایێن تورکیا بمینن ئەو دێ ئۆپەراسیۆنێن سەربازی ب دژواری بەردەوام بکەن و گۆت: (ھەموو وەلاتیێن کورد پشکەکن ژ نەتەوا تورکیا و وەلاتیێن کورد وەلاتیێن ب رومەت یێن ڤی وەلاتی نە و ئەم وان ژ PKK جودا دبینین و جارەکا دی دوپات دکەم کو یان دێ PKK چەکێن خوە بن ئاخ بکەت و تەسلیم ببیت یان ژی ھەتا یەک تیرۆریست بمینیت ئەم ێ ئۆپەراسیۆنێن خوە یێن دژوار ل ھەر جھەکی بەرفرەھتر کەین).
ئەحمەد داوود ئوگلۆ سەرۆک وەزیرێن حوکمەتا بەروەخت یا تورکیا ژی راگەھاند کو رۆژانە ب دەھان چەکدارێن PKK ژ ئالیێ لەشکرێن تورکیا ڤە دھێنە کوشتن و گۆت: (ھەر جھەکی تیرۆرست لێ ھەبیت ئەم دێ وێرێ ژناڤ ببەین و د ھەمان دەمی دا داخوازێ ژ ئەمریکا و ھێزێن نێڤدەولەتی دکەم کو بلا پەیوەندیێن خوە یێن ب PYD و چەکدارێن وێ را ژ بەر چاڤان دەرباز بکەن، ژ بەر کو PYD پشکەکە ژ رێکخستنا تیرۆرست و ئەم قەبوول ناکەین ھێزەکا تیرۆرست ل سەر سنۆرێن مە ببیتە دەستھەلاتدار).
ھەر د ڤێ دەربارێ دا سەلاحەدین دەمیرتاش ھەڤسەرۆکێ HDP ژی د کۆمبوونا جەماوەری یا ل باژێرێ شتوتگارت یێ ئەلمانیا راگەھاند کو شەر ژ ئالیێ سەرۆک کۆمار ئەردۆگان و حوکمەتا ئاکپارتی ڤە ھاتیە دەستپێ کرن و ئەردۆگانی بۆ بجە کرنا دەستھەلاتا خوە یا تاکەکەسی مێزا دانوستاندنان ژناڤبر و وەلات کرە مەیدانا شەرەکی دژوار و گۆت: (بۆ ئەردۆگانی نە گرنگە لاوێن کورد یان سەربازێن تورک بھێنە کوشتن و بۆ ئەردۆگانی چ قیمەتا ژیانا وەلاتیان نینە و ب تنێ یەک دەردێ وی ھەیە ودخوازیت دکتاتۆریەتا خوە ل ھەموو وەلات بجە بکەت، ژ بەر ڤێ چەندێ دڤێت د ڤێ ھەلبژارتنا بھێت دا ھەموو خەلکێن تورکیا دو جاران ھزر بکەن و دەنگێ خوە بدەن، پێدڤیە ئەم ھەموو وەلاتیێن کورد و تورک و نەتەوێن دی و ھەموو باوەریێن جودا پێکڤە وەلاتی ژ ئەردۆگانی و ھەڤالێن وی رزگار بکەین و بۆ وان بێژین ئێدی بەسە و ئەم دەریێن دادگەھکرنا وان ڤەکەین، ھەکە ئەم وەسا بکەین ئەم دێ پاشەرۆژا وەلاتێ خوە روناک کەین و شەری و رێتنا خوینێ بدەینە راوەستاندن).
ل ئالیێ دی موراد قەرەیلان فەرماندارێ ھێزێن پاراستنا گەل و ئەندامێ دەستەیا برێڤە بریا KCK ژی بۆ تەلەفزیۆنا ستێرک راگەھاند کو ل ھەمبەر ھەر ھێرشەکی سەرباز و پۆلیسێن تورکیا بۆ سەر گەریلا و وەلاتیێن کورد ئەو دێ بەرسڤا دژوار بدەن و گۆت: (ئەم بۆ شەرەکی مەزن ژی ئامادەینە کۆ د ڤی شەری دا باژێر و باژێرکێن کوردستانێ ئازاد بکەین و د ھەمان دەمی دا ئەم بۆ ئاشتیەکا سەرتاسەری ژی ئامادەینە کو د ڤێ ئاشتیێ دا پرسگرێکا کوردی بھێتە چارەکرن و ژیانەکا دیمۆکراتیک و سیستەمەکا وەکھەڤ یا دیمۆکراتیک بھێتە ئاڤاکرن، لێ دیسان ئەم دبێژین ئەم یەک ھێرشەکی دەولەتا تورکیا ژی بێ بەرسڤ ناھێلین و ئەم دێ ب دژواری بەرسڤا ھێرشێن وان بدەین).
