وەبەرئینەرەکێ دھۆکێ ل ھەلەبجە ھاتە دەستەسەرکرن
ئه‌ڤرۆ نيوز:
وەبەرئینەرەکێ پارێزگەھا دھۆکێ ب ناڤێ بجە ئینانا پڕۆژێن وەبەرئینانێ پارێ ھژمارەکا بەرچاڤ یا وەلاتیێن پارێزگەھا ھەلەبجە بریە و پۆلیسێن ھەلەبجە ژی دیار کر کو ئەو وەبەرئینەرێ دھۆکێ یێ ھاتیە دەستەسەرکرن و نوکە د زیندانەکا ھەلەبجە دایە ھەتا دادوەر بڕیارێ ل دۆر بادەکا وی ددەت.
رائید بارزان ھەلەبجەیی، پەیڤدارێ پۆلیسێن پارێزگەھا ھەلەبجە بۆ رۆژناما ئەڤرۆ ئاشکرا کر کو وەبەرئینەرەکێ خەلکێ پارێزگەھا دھۆکی ل سالێن بۆری بۆ ئەنجامدانا چەند پڕۆژێن وەبەرئینانێ ھاتیە پارێزگەھا ھەلەبجە، بەلێ ئەو پڕۆژە نەھاتینە بجە ئینان و پارێ وەلاتیان ل دەف بەلێندەری مایە لەوڕا ھژمارەکا وەلاتیان سکالا ل سەر بەلێندەر (م) یێ د ژیێ 31 سالیێ دا کو ئاکنجیێ دھۆکێ یە تۆمارکریە و پشتی وەرگرتنا فەرمانا دادوەری ئەو وەبەرئینەر ژ لایێ ھێزەکا پۆلیسێن باژێڕێ ھەلەبجە ڤە ھاتیە دەستەسەرکرن و نوکە یێ د زیندانەکا باژێڕێ ھەلەبجە ڤە و گۆت: “ئەڤە حالەتێ ئێکێ یێ دەستەسەرکرنا وەبەرئینەرەکی یە ل باژێرێ ھەلەبجە”.
ژ لایێ خوە ڤە ژی ژێدەرەکێ ئاگەھدار بۆ رۆژناما ئەڤرۆ ئاشکرا کر کو ئەو وەبەرئینەرێ ژ لایێ پۆلیسان ڤە ھاتیە دەستەسەرکرن خەلکێ دھۆکێ یە و دگەل بەرپرسێن بەرێ یێن ھەلەبجە دەست ب وەرگرتنا پارەی ژ وەلاتیان کربوو ب ناڤێ بجە ئینانا پڕۆژێن وەبەرئینانێ، بەلێ پارێ وەلاتیان بریە و چو پڕۆژە ژی ئەنجام نەداینە و گۆت: ” ئەو کەسێن ل ھەلەبجە دەست دگەل ڤی وەبەرئینەری ھەی ھەتا نوکە نەھاتینە دەستەسەرکرن”.
