وەزارەتا ئەوقافێ رێنمایێن ھەیڤا رەمەزانێ بەلاڤکرن
وەزارەتا ئەوقاف و کاروبارێن ئایینی یا حوکمەتا ھەرێما کوردستانێ رێنمایێن کارگێری و شەرعی یێن ھەیڤا رەمەزانا پیرۆز بەلاڤکرن و داخوازێ ژ یەکێن کارگێری دکەت سەرپەرشتی و دووڤچوونا بحهئينانا رێنمایان بکەن.
وەزارەتا ئەوقاف و کاروبارێن ئایینی یا حوکمەتا ھەرێما کوردستانێ ئەڤرۆ 14ى گۆلانا 2018ێ رێنمایێن کارگێری و شەرعی یێن ھەیڤا رەمەزانا پیرۆز بەلاڤکرن کو وێنەک ژێ ب دەست ئەڤرۆ نیۆز کەفتیە و تێدا ھاتیە کو پێدڤیە ھەموو خوارنگەهـ و دوکان و كازینۆ و بازاڕ پیرۆزیا ھەیڤا رەمەزانێ ل بەرچاڤ بگرن و چو تشتان بەلاڤ نەکەن کو ل گەل پیرۆزیا ڤێ ھەیڤێ نەگۆنجیت و نابیت خوارن و ڤەخوارن د ڤێ ھەیڤا پیرۆز دا ل دامودەزگەھێن فەرمی بھێنە پێشکێشکرن.
د ھەمان رێنما دا ھاتیە پێدڤیە دەزگەھێن راگەھاندنێ تایبەتمەندی و پیرۆزیا ھەیڤا رەمەزانێ ل بەرچاڤ وەرگرن و چو تشتان بەلاڤ نەکەن کو ل گەل پیرۆزیا ڤێ ھەیڤێ نەگۆنجیت و رێنمایێن تایبەت بۆ مزگەفتان و مامۆستایێن ئایینی ژی ژ ئالیێ وەزارەتێ ڤە دەرچووینە و پێدڤیە ھاریکاری د ب جهئينانا وان دا بھێتەکرن.