وەزارەتا دەرڤەیا ئیراقێ: پەیاما عەبدوللا ئۆجەلانی بۆ ئیراقێ و هەرێما كوردستانێ یا گرنگە
وەزارەتا دەرڤەیا ئیراقێ د بەیاننامەیەكێدا، پێشوازی ل پەیاما رێبەرێ زیندانكریێ PKK كر بۆ چەكدانانێ و هەلوەشاندنێ، دیاركر ژی: پەیاما ئۆجەلانی نەك تنێ بۆ ئیراقێ، بۆ هەرێما كوردستانێ ژی یا گرنگە.
وەزارەتا دەرڤەیا ئیراقێ د بەیاننامەیا خوەدا ئاماژە ب وێ چەندێ كر، پەیاما عەبدوللا ئۆجەلانی، پێنگاڤەكا ئەرێنی و گرنگە بۆ پەیداكرنا ئارامیێ ل دەڤەرێ. هەروەسا دیاركر ژی كو ئەو پێنگاڤا ئۆجەلانی نە تنێ بۆ ئیراقێ یا گرنگە، بەلكو بۆ هەرێما كوردستانێ ژی یا گرنگە كو چەكدارێن PKK ل دەڤەرێن وی یێن هەین، هەڤدەم بۆ هەموو دەڤەرێ ژی گرنگییا خوە یا هەی.
وەزارەتا دەرڤەیا ئیراقێ دیاركر ژی كو چارەسەریێن سیاسی و دانوستاندن، تاكە رێكە و باشترین رێكە بۆ ب دووماهیئینانا ململانێیان، ئەو چەندە ژی خزمەتا بەرژەوەندییا هەموو ئالییان دكەت و پێكڤەژیانا ئاشتییانە پێشڤە دبەت.
ل دووماهییا بەیاننامەیا خوە، وەزارەتا دەرڤەیا ئیراقێ گۆت: پشتەڤانیێ ل هەموو بزاڤان دكەین بۆ چارەسەركرنا كێشەیان ب رێكا دانوستاندنێ، دخوازین پەیاما ئۆجەلانی ب كریار بهێتە بجهئینان ژ ئالیێ PKK ڤە ب دانانێ چەكی.
