وەزارەتا ساخلەمیا هەرێما کوردستانێ: رێکارێن توند هاتینە کرن هەمبەری هاتنا وەلاتیێن ئیرانێ بۆ هەرێما کوردستانێ
ئەڤرۆ نیوز:
وەزارەتا ساخلەمیا هەرێمێ راگەهاندیە، ، وان رێکارێن توند گرتینە بەر ل هەمبەر هاتنا وەلاتیێن ئیرانى بۆ هەرێمێ و چ کەسەک بێ پشکنین ناهێتە هەرێما کوردستانێ.
پشتى ئەڤرۆ ل ولاتێ ئیرانێ دو کەسان ب ئەگەرێ تۆشبوونا ڤایرۆسێ کۆرۆنا ژیانا خۆ ژ دەست داین، محەمەد مەلا قادر پەیڤدارێ وەزارەتا ساخلەمیا هەرێمێ دیار کر، چ کەس بێی پشکنین ناهێتە د ناڤ ئاخا هەرێمێ دا و پێدڤیە ساخلەمیا وان پشتراستبن پاشی رێکی پێبدەن بهێنه کوردستانێ.
گوت ژى، ئەو وەلاتیێن هەرێمێ ژى یێن چووینە ئیرانێ دێ ب تەمامى پشکنین بۆ هێنە کرن، پاشی دێ رێک پێ هێتە دان کو بۆ هەرێمێ ڤەگەرن.
بەحس ژى کر، هەمى ئەو کەسێن ل وان وەلاتێن کو ڤایرۆسێ کۆرۆنا تێدا دهێنە هەرێمێ، دەستپێکێ دێ هێنە جۆداکرن و پشکنین دێ بۆ هێنە کرن.
ئەڤە ژى د دەمەکی دایە، کو ئەڤرۆ چارشەمبی وەزارەتا ساخلەمیا هەرێمێ د کونفرانسەکێ رۆژنامەڤانی دا راگەهاند هەتا نوکە چ حالەتێن توشبوون ب نەخوشیا کۆرۆنایێ ل هەرێمێ نەهاتینە تۆمار کرن.
