وەزارەتا پەروەردێ ئاڤاھیێن خوە ژ حزبێن سیاسی وەردگریت
ئەڤرۆ نيوز:
وەزارەتا پەروەردێ لژنەکا تەخمینکرنێ پێکئینایە بۆ دووڤچوون و ڤەکۆلینێ ل سەر ھەموو ئەو ئاڤاھیێن حزبێن سیاسی دەست ب سەرداگرتی و داینە کەرتێ تایبەت ژی، ھەر لایەنەک بەری ئاڤاھیێن وەزارەتا پەروەردێ ب زڤرینیت پێدڤییە کریا سالێن چووی ژی بدەت.
ئەندامەکێ لژنا پەروەردێ ل پەرلەمانێ کوردستانێ گۆت: “وەزارەتێ ب رەزامەندیا خوە ھندەک ئاڤاھی داینەڤ قوتابخانێن ئەھلی”.
وەزارەتا پەروەردێ 120 ئاڤاھیێن گشتی ل سەرانسەری ھەرێما کوردستانێ ھەنە، ھندەک ژ لایێ حزبێن سیاسی ڤە ھاتینە داگیرکرن و ھندەک ژی داینەڤ قوتابخانێن ئەھلی.
رێڤەبەرێ گشتیێ دیوانا وەزارەتا پەروەردێ بۆ رووداو دبێژیت: “گەلەک جارا ئەنجوومەنێ وەزیران ب نڤێسارێن فەرمی ئاگەداریا وان کریە، بەلێ چو بەرسڤ نەبووینە، نوکە ئەو ھەموو بادەکە بۆ لژنا چاکسازیێ دێ ھێنە رەوانەکرن”.
ل سالا 2012 ێ پەرلەمانی َکوردستانێ ب رێیا ئەنجوومەنێ وەزیران ب نڤێسارێن فەرمی ئاماژە دایە کو 150 ئاڤاھیێن وەزارەتا پەروەردێ دەست ب سەردا ھاتینەگرتن، بەلێ ئەڤ ژمارە نوکە یا کێم بووی، ئەندامەکێ لژنا پەروەردێ ب ئاشکرایی دبێژیت: “ھندەک وەزیرا ئاڤاھیێن پەروەردێ داینەڤ قوتابخانێن ئەھلی”.
وەزارەتا پەروەردێ 189 ئاڤاھی ب کرێ یێن گرتین، ئەگەر ھەموو ئەو ئاڤاھیێن پەروەردێ ئەڤێن قوتابخانێن ئەھلی دەست ب سەردا گرتین ب زڤرن بۆ وەزارەتێ و ئاڤاھیێن ب کرێ نەگریت دێ ب سەدان ملیۆن دینار وەکو داھات بۆ وەزارەتا پەروەردێ زڤرن.