وەزارەتا پەروەردێ پێدڤی ب شەش ھزار ماموستایانە
ئه‌ڤرۆ نيوز:
پتریا قوتابخانێن ھەرێما کوردستانێ ژ نەبوون و کێمیا میلاکی و ماموستایان دنالیت، رێڤەبەرێن قوتابخانان ژی ناچاربووینە ڤالاتیێن خوە ب ماموستایێن وانەبێژ پربکەن. ئێکەتیا ماموستایان ژی راگەھاند کو نھا ١٢٣ ھزار ماموستا ل ھەرێما کوردستانێ ھەنە و ئەو وانا بۆ ملیۆنەک و ٢٠٠ ھزار قوتابیان دبێژن و ئەڤە ژی رێژەکا گەلەک کێمە، چونکو وەزارەتا پەروەردێ پێدڤی ب شەش ھزار ماموستایێن دی ھەیە بۆ پرکرنا ھندەک ژ وان ڤالاتیێن گرنگ.
سەرۆکێ ئێکەتیا ماموستایێن کوردستانێ بۆ ئەڤرۆ دیار کر، نھا ١٢٣ ھزار ماموستا ل وەزارەتا پەروەردێ ھەنە کو ب کارێ ماموستایێ رادبن، ژ ڤێ رێژێ ژی ھژمارەک باش ژ وان مۆلەتا دایکینیێ و بێ مۆچەیی ھەنە و ل گەل ھندێ ژی ئەڤ رێژا ماموستایان بۆ ھەرێما کوردستانێ گەلەک یا کێمە و گۆت: ھەکە شەش ھزار ماموستایێن دی بھێنە دامەزراندن، دبیت ھندەک ژ ڤالاتیێن گرنگ پربکەت، ھەکە ھەر ھەموو پێدڤیێن قوتابخانان ژ میلاکی پرناکەن.
عەبدولواحد محەمەد ئاماژە دا وێ چەندێ، پێدڤیە وەزارەتا پەروەردێ چارەیەکا بلەز ل کێشا کێمیا ماموستایان ل ھەرێما کوردستانێ بکەت، چونکو نھا ل بەردەم مەترسیەکا مەزن دایە، ژ بەرکو ملیونەک و ٨٠٠ ھزار قوتابی ئەڤ سالە ل وەرزێ نوو یێ خواندنێ دخوونن و ئەڤە ژی رێژەکا گەلەک مەزنە و ماموستا نەشێن ھەموویان برێڤەببەن و گۆت ژی: دڤێت شەش ھزار ماموستا یان بھێنە دامەزراندن یان ژی ب گرێبەست دەست ب دەواما خوە بکەن.
ناڤبری زێدەتر دبێژیت: یان ژی دڤێت وەزارەتا پەروەردێ چاڤخشاندنەکێ ل ناڤ قوتابخانان بکەت، چونکو ل ھندەک قوتابخانان میلاکێ ماموستایان یێ زێدەیە و ب واستە ھاتینە ڤەگوھاستن و ل جھێ خوە ماینە و ل ھندەک قوتابخانان ب چو رەنگان میلاک نینە و قوتابخانە ب وانەبێژان برێڤەدچیت، ڤێ ژی مەترسیەکا مەزن بەرامبەر خواندنا قوتابیان کریە و پێدڤیە ب لەز بھێتە چارەکرن.
سەرۆکێ ئێکەتیا ماموستایێن کوردستانێ نە ڤەشارت، ل ھەرێما کوردستانێ نھا بۆ ھەر ١٧ قوتابیان مامۆستایەک ب بەر دکەڤیت، ھەکە ھەموو ماموستا ب دروستی دەوامێ بکەن و بێ مۆلەتبن، رەنگە ھەر ١٤ قوتابیان مامۆستایەک ب بەربکەڤیت و گۆت ژی: بۆ ئەڤ سالە نێزیکی سێ ھزار ماموستایان مۆلەتا دایکینیێ وەرگرتیە و ڤێ ژی کارتێکرنەکا مەزن کریە سەر کێمیا میلاکی.
تێ زانین ل سالا بۆری وەزارەتا پەروەردێ داخواز ژ حوکمەتا ھەرێما کوردستانێ کربوو شەش ھزار پلێن دامەزراندنێ بۆ وەزارەتا وان دابین بکەن، بەلێ ب تنێ چار ھزار پلە دابوون و ئەو ژی ب شێوێ گرێبەست و ب تنێ بۆ ھندەک تایەبتمەندیان بوو، وەکو زانستێن کیمیا و فیزیا و بایولوجی، بۆ ئەڤ سالە ژی ھێشتا دیار نینە کا دێ دامەزراندن بۆ ماموستایان ھەبیت یان نە.
