وەزیرێ دەرڤە یێ ئەلمانیا يێ به‌رێ: کوردان بۆ ھەموو جیھانێ سەلماندینە ئەو ھەژی دەولەتبوونێ نە
ئه‌ڤرۆ نيوز:
وەزیرێ بەرێ یێ دەرڤە یێ ئەلمانیا راگەھاند کو رۆژھەلاتا ناڤین بەر ب گوھۆرینێن مەزن ڤە دچیت و ھەتا کورد ژی وەکو نەتەوێن دی ل رۆژھەلاتا ناڤین دەولەتا خوە ئاڤا نەکەن دێ پرسێن ل رۆژھەلاتا ناڤین د بەردەوام بن و کوردان بۆ ھەموو جیھانێ سەلماندینە کو ئەو ھەژی ھندێ نە دەولەتا خوە ئاڤا بکەن.
یوشکا فیشر وەزیرێ بەرێ یێ دەرڤە یێ ئەلمانیا د داخۆیانیەکێ دا بۆ یورۆنیۆز راگەھاند کو ناکۆکیێن ل رۆژھەلاتا ناڤین ھەتا نھا ژی بەردەوام دکەن و ئەو ناکۆکی دێ ھەر بەردەوام بن، چونکو ئێک ژ گەلێن ھەری مەزن ل رۆژھەلاتا ناڤین کوردن و مخابن زۆلم و زۆرداریا ل سەر کوردان بەردەوامە و ھەتا نھا ژی کورد بێ دەولەتن و ھەتا رەوش وەکو نھا بەردەوام بیت دێ ئالۆزیێن ل رۆژھەلاتا ناڤین ژی د بەردەوام بن و گۆت: (کوردان د شەرێ ل دژی داعشێ رۆلەکێ سەرەکی دیتن، وان شیا سیمبۆل و ترسا داعشێ ژناڤ ببەن، چنکو ھێزێن دو دەولەتان ل ھەمبەر داعشێ شکەستن ئینان، لێ کوردان شیان ل ھەمبەر داعشێ شەری بکەن و دربێن کوژەک ل وێ رێکخراوا تیرۆرستی بدەن و ژ بەر ھندێ ژی کوردان بۆ ھەموو جیھانێ سەلماندینە کو ئەو ھەژی دەولەتبوونێ نە و دڤێت ھەموو وەلاتێن جیھانێ نھا پشتەڤانیێ ل دەولەتبوونا کوردان بکەن).
ناڤبری د پشکەکا دی یا ئاخڤتنێن خوە دا ئەو یەک ژی دیار کر کو مخابن گەلەک جاران ھێزێن جیھانی بزاڤ کرینە کو پرسێن رۆژھەلاتا ناڤین چارەسەر بکەن لێ گۆھداریا کوردان نەھاتیە کرن، داخوازیێن کوردان بەرچاڤ نەھاتینە وەرگرتن و ژ بەر ھندێ ژی ھەتا نھا شەر و ئالۆزی ل رۆژھەلاتا ناڤین د بەردەوامن و ئاشتی بنەجە نەبوویە و ھەکە ھێزێن جیھانی نھا گوھۆرینێ د ھەلویستێ خوە دا نەکەن دیسان نەشێن پرسێن رۆژھەلاتا ناڤین چارەسەر بکەن و گۆت: (دڤێت کورد ژی وەکو گەلێن دی بگەھنە مافێن خوە و ل سەر ئاخا خوە بژین، ھەکە ئەو یەک ھاتە کرن دێ ھەموو پرسێن رۆژھەلاتا ناڤین ژی چارەسەر بن، چونکو ئەزموونێن سەدسالێن بۆری ڤێ راستیێ باش نیشا مە ددەن).
وەزیرێ بەرێ یێ دەرڤە یێ ئەلمانیا ئەو یەک ژی راگەھاند کو سەرەرای ھندێ کورد خوەدان دەولەتا خوە نەبوون، لێ پتر ژ ھێزا دەولەتەکێ شیان شەرێ مەزنترین رێکخراوا تیرۆرستی ل جیھانێ بکەن و بۆ ھەموو کەسەکێ ژی سەلماندن کو مافێ وانە دەولەتا خوە ئاڤا بکەن، قارەمانیا کوردان ل ھەمبەر داعشێ دڤێت ب چو رەنگەکێ نەھێتە ژبیر کرن و باشترین بەرسڤ ژی بۆ وێ قارەمانیا کوردان ئەڤە کو ھێزێن جیھانی پشتەڤانیێ ل دەولەتا کوردی بکەن، چونکو ھەرێما کوردستانێ نھا د ھەموو بیاڤەکێ دا وەکو دەولەتەکێ کار دکەت و ب تنێ دانپێدانا نێڤدوەلەتی یا مای و ئەو ژی ئەرکێ جڤاکێ نێڤدەولەتیە کو پشتەڤانیێ ل مافێ رەوا یێ کوردان بکەت و گۆت: (ل گۆر نێرینا من نھا کورد ھەڤپەیمانێ سەرەکی یێن وەلاتێن رۆژئاڤایی نە، گەلەک ھەڤپەیمانێن مە ل رۆژھەلاتا ناڤین ل تەنگاڤیێ دا ئەم ب تنێ ھێلاین و نھا کورد گەلەکێ ب ھێزن و ھەڤپەیمانەکێ باشن و ژ بەر ھندێ ژی دڤێت وەلاتێن رۆژئاڤایی کوردان ب تنێ نەھێلن و پشتەڤانیێ ل دەولەتا کوردی بکەن، ئەو یەک د بەرژەوەندیا ئەمریکا و وەلاتێن ئورۆپایە).
ھەژی ئاماژەپێدانێ یە کو یوشکا فیشر سالا ١٩٩٨ ھەتا ٢٠٠٥ وەزیرێ دەرڤە یێ ئەلمانیا و جێگرێ سەرۆک وەزیران بوو و ب ئێک ژ سیاسەتمەدارێن سەرکەفتی یێ ئەلمانی دھێتە ھژمارتن.
