وەزیرێ ساخلەمیا هەرێما کوردستانێ: هەتا نوکە چ حالەتێن توشبوونێ ب ڤایرۆسێ کۆرۆنا نەهاتینە تۆمار کرن
ئەڤرۆ نیوز:
وەزیرێ ساخلەمیا هەرێما کوردستانێ راگەهاند، هەتا نوکە چ حالەتێن توشبوونێ ب ڤایرۆسێ کۆرۆنا نەهاتینە تۆمار کرن، هەروەسا دێ رۆژانە زانیاری دەربارەى ڤایرۆسێ کۆرۆنا هێنە بەلاڤکرن.
ئەڤ شەڤە د. سامان حسێن بەرزنجی وەزیرێ ساخلەمیا هەرێمێ د کونفرانسەکێ رۆژنامەڤانی دا راگەهاند، هەتا نوکە نێزیکى دو هزار کەسان ژ ئیرانێ ڤەگەریانە و حەفت کەس وەک گومان لێکری هاتینە جۆداکرن و پشتى پشکنیان شەش کەس پاقژبووینە و ئێک ژی مایە.
هەروەسا راگەهاند ژى، هەتا نوکە چ حالەتێن توشبوونێ ب ڤایرۆسێ کۆرۆنا ل هەرێما کوردستانێ نەهاتینە تۆمار کرن، لێ هەر کەسێ ژ ئیرانێ ڤەگەریت دێ کەڤیتە دبن چاڤدێریێ دا.
وەزیرێ ساخلەمیا هەرێمێ زێدەتر گۆت، وەک وەزارەتا ساخلەمیێ دێ رۆژانە زانیاریان دەربارەى ڤایرۆسێ کۆرۆنایێ بەلاڤ کەین، داکو دو دلی و ترس د ناڤ وەلاتیان دا نەمینیت و باندور ژی ل سەر بازار و جهێن گشتى دروست نەبیت.
ناڤهاتی ئەو ژی ئاشکرا کر، ژ رۆژا ئەینیێ ڤە نێزکی دو هزار گەشتیاران ژ ئیرانێ ڤەگەریاینە و دبن چاڤدێریا نۆشداران دانە و نێزیکی ١٠ جهێن تایبەت بۆ هاتینە دابینکرن بۆ ئەنجامدانا پشکنینان و چاڤدیریکرنا هەر کەسەکێ کو ژ ئیرانێ ڤەگەریت و پشکنینا پلا گەرمێ بۆ دهێتە کرن هەتا ژێ پشتراست بین، داکو بزانین کا ئەو کەسە تۆشی ڤایرۆسێ کۆرۆنایێ بووینە یان نە، ژبەر وەرگرتنا چارەسەریێ.
