وەزیرێ وزێ یێ تورکیا: ئەم دێ پێدڤیێن خوە یێن وزێ ژ ھەرێما کوردان و قەتەرێ دابین کەین
ئەڤرۆ نیوز:
وەزیرێ ژێدەرێن سروشتی و وزێ یێ تورکیا راگەھاند کو پەیوەندیێن وان ل گەل حوکمەتا ھەرێما کوردستانا عیراقێ د ئاستەکی بلند دانە و دێ پێدڤیێن گازا سروشتی و پەترۆلێ ژ ھەرێما کوردان و قەتەرێ دابین کەن و گۆت: (ئەم د چ واری دا ب روسیایێ ڤە گرێدای نینە و ئەم دشێین ژ وەلاتێن ھەڤسو و گازا سروشتی و پەترۆلێ بکڕین و پەیمانێن نوو ئیمزا کەین).
بەرات ئالبایراک وەزیرێ ژێدەرێن سروشتی و وزێ یێ حوکمەتا تورکیا د داخویانیەکی دا راگەھاند کو د رەوشا نھا دا ئەو ڤەکۆلینێ ل سەر ژێدەرێن سروشتی و گاز و پەترۆلێ دکەن و گۆت: (وەک ھەموو کەس دزانیت روسیا دخوازیت ب بڕینا گازا سروشتی فشارێ بێخیتە سەر وەلاتێ مە و بۆ ڤێ چەندێ ژی نھا ئەم ل گەل ھەرێما کوردستانا عیراقێ و قەتەرێ د ناڤ پەیوەندیێن گەلەک باش داینە و ھەموو پەیوەندیێن مە د بەرژەوەندا ھەرێمێ و تورکیا و کوردستانا عیراقێ و قەتەرێ داینە و ئەم دێ پێدڤیێن خوە یێن گازا سروشتی و پەترۆلێ ژی ژ ھەر دو وەلاتان دابین کەین و بڕینا گازێ ژ ئالیێ روسیا ڤە چو کاریگەریەکا خراب ل سەر وەلاتێ مە ناکەت).
بەرات ئالبایراک وەزیرێ ژێدەرێن سروشتی و وزێ کۆ د ھەمان دەمی دا زاڤایێ سەرۆک کۆمارێ تورکیا رەجەب تەیب ئەردۆگانی یە، ھەروەسا راگەھاند ژی تورکیا وەلاتەکی گەلەک مەزن و خوەدان شیانە و سەرێ خوە بۆ فشارێن چو وەلاتەکی ناچەمینیت و گۆت: (مە خواست روسیا شاشیێن خوە تێبگەھیت و وەسا نێزیکی رەوشا ئاوارتە ببیت، لێ مخابن روسیا رۆژ ب رۆژێ رەوشا رۆژھەلاتا ناڤین و سووریێ ئالۆزتر دکەت و پەیوەندیێن دو ئالی دئێخیتە مەترسیێ. ئەز جارەکا دی دوپات دکەم کو ئەم د چ واری دا پێدڤی روسیا نینن و بەلکو ب ڤان فشارێن خوە یێن ئابووری دێ خوە تووشی زیانەکا مەزن کەت، ژ بەر ڤێ چەندێ ژی ھێڤیا مە ئەوە کو د زوترین دەم دا ژ شاشیێن خوە ڤەگەرن).
وەزیرێ وزێ یێ تورکیا ھەروەسا راگەھاند ژی کو ئەڤ چەند سالن د ناڤبەرا حوکمەتا وان و حوکمەتا ھەرێما کوردستانێ دا پەیوەندیێن ئابووری، سیاسی، ئێمناھیێ و بازرگانی د ئاستەکی گەلەک بلند دانە و گۆت: (راستە پێدڤیا مە ب گازا سروشتی و پەترۆلێ ھەیە لێ ئەم دشێین ڤێ پێدڤیا خوە ژ ھەرێما کوردستانا عیراقێ و قەتەرێ دابین کەین و ل گەل ھەردو وەلاتان پەیمانێن نوو د وارێ وزێ دا ئیمزا کەین و ھەتا نھا ھەردو وەلاتێن دۆست ب رەنگەکی گەرم نێزیکی تورکیا دبن و ئەم ژی ھەردو وەلاتان وەک دۆست و برایێن خوە دبینین).
بەرات ئالبایراک وەزیرێ ژێدەرێن سروشتی و وزێ د پشکەکا دی یا ئاخڤتنا خوە دا ژی سەرنج راکێشا سەر رەوشا سووریێ و ھێرشێن روسیا بۆ سەر سۆپایێ ئازاد و تورکمانان و دیار کر رۆژانە فرۆکێن شەری یێن روسیا و یێن سووریێ بنگەھێن تورکمانان و سۆپایێ ئازاد بۆمبەباران دکەن و خەلکێ سڤیل دکوژن و گۆت: (چ مافێ روسیا، ئیران و حیزبوللا نینە کو بھێنە سووریێ و ل نێزیکی سنۆرێ تورکیا ئۆپەراسیۆنان ئەنجام بدەن و گەفان ل گەلێ تورکمان بکەن و ئەم ھەڤسویێ سووریێ نە و مافێ مەیە ئەم دەستێوەردانێ د رەوشا سنورێن خوە دا بکەن. ھەکە ھەتا نھا ھژمارا کوشتیان ل سووریێ نەگەھشتینە ملیۆنان ئەو ب سایا تورکیا بوویە و مە دەریێن وەلاتێ خوە بۆ برایێن خوە یێن سووریێ ڤەکریە و چ ژ دەستێ مە بھێت بۆ پاراستنا خەلکێ سڤیل ژی ئەم دکەین).
د دووماھیا ئاخڤتنا خوە دا ژی وەزیرێ ژێدەرێن سروشتی و وزێ یێ تورکیا راگەھاند ژی ئەو ھیڤیدارە جڤاتا نێڤدەولەتی و وەلاتێن ھەڤپەیمانانان سنۆرەکێ ژ بۆ زێدەگاڤیێن روسیا و ئیرانێ دانن و نەھێلن زێدەتر رەوشا ھەرێمێ ئالۆزتر بکەن و گۆت: (روسیا ب دەھان جارە ب بەلگەیێن درەوین دخوازیت مە وەک ھەڤکارێ داعشێ نیشان بدەت و وەسا بدەتە خوەیاکرن کو ئەم پەترۆلێ ژ داعشێ دکڕین، لێ ئەو گۆتنێن روسیا درەون و چو بنگەھەکا وێ یا راست نینە و د راستی دا دڤێت روسیا و ئیران پیلانێن خوە یێن کرێت ل سووریێ ئاشکرا بکەن ژ بەر کو یێن رۆژھەلاتا ناڤین ئالۆز دکەن ئەو ب خوە نە و ئەم ژی ھەول ددەین شەری ل سووریێ بدەینە راوەستاندن و جارەکا دی رەوشێ ئارام کەین).
