وەزیرەکێ بەرێ یێ ئەمریکا: پێدڤیا تورکیا و ئەمریکا ب ھەڤدو ھەیە
ئه‌ڤرۆ نيوز:
ھولیا پۆلات بەرپرسا دەنگێ ئەمریکا پشکا تورکی راگەھاند کو رایا گشتی یا تورکیا دبێژن ئەردۆگان و ترامپی د گەلەک بیاڤان دا وەکو ئێکن و د دەمێ ھەلبژارتنێن ئەمریکا دا ئەردۆگان و دەستھەلاتا ئاکپارتی دخواستن کو دۆنالد ترامپ سەرکەڤیت و گۆت: (رایا گشتی یا تورکیا و زانایێن سیاسەتێ پێشبینی دکرن کو پشتی ترامپ ببیتە سەرۆکێ ئەمریکا دێ پەیوەندیێن ل گەل ئەمریکا بگەھیتە ئاستێ ھەری باش لێ پەیوەندیێن ھەردو ئالیان گەلەک ئالۆز بووینە و سەدەمێن ڤێ ژی مرۆڤ دشێت د پێنج خالان دا دەستنیشان بکەت، یا یەکێ پرسگرێکا کوردی و سیاسەتا تورکیا ل سووریێ، یا دویێ کڕینا سارۆخێن ئێس ٤٠٠ ژ روسیا، یا دی باشبوونا پەیوەندیێن تورکیا و ئیرانێ، یا چارێ شکاندنا سزایێن ئابووری یێن ل سەر ئیرانێ ژ ئالیێ تورکیا ڤە و یا پێنجێ گرتنا قەشەیێ ئەمریکا، پرسێن د ناڤبەرا ھەردو ئالیان گەلەک مەزنن و چارەکرنا ڤان پرسان ئاسان نینە).
لیۆن پانیتا وەزیرێ بەرێ یێ بەرگیریێ یێ ئەمریکا ژی د ڤێ مژارێ دا راگەھاند کو ھەر چەندە پرسێن د ناڤبەرا تورکیا و ئەمریکا دا مەزن بن ژی د سەدسالا ٢١ دا پێدڤیا ھەردو ئالیان ب ھەڤدو ھەیە و گۆت: (ھەکە ھەردو ئالی ب دروستی بخوازن دشێن ب دبلۆماسیێ پرسێن د ناڤبەرا خوە دا چارە بکەن و بۆ ڤێ چەندێ ژی ئازادکرنا قەشە برونسۆنی گەلەکا گرنگە لێ پرسێن د ناڤبەرا ھەردو ئالیان دا ب ئازادیا قەشەیی ژی چارە نابن، ژ بەر کو دڤێت تورکیا د وارێن دیمۆکراسیێ، مافێن مرۆڤی دا پێنگاڤان ب ھاڤێژیت و پەیوەندیێن خوە یێن ل گەل روسیا و ئیرانێ سنۆردار بکەت و پێگیریێ ب سزایێن ئابووری یێن ل سەر ئیرانێ بکەت، ھەکە تورکیا د ڤان واران دا پێنگاڤان ب ھاڤێژیت دێ پەیوەندیێن ھەردو ئالیان بەر ب چارەکرنێ ڤە بچن).
رۆبرت پیارسۆن بالیۆزێ بەرێ یێ ئەمریکا ل تورکیا ژی راگەھاند کو ئالۆزیێن د ناڤبەرا ئەمریکا و تورکیا دا گەھشتینە وی ئاستی کو تورکیا گەفا داخستنا بنگەھێ سەربازی یێ ئینجیرلیک ل ئەمریکا بکەت و ئەمریکا ژی سزایێن ئابووری و سیاسی ل سەر تورکیا بسەپینیت و گۆت: (ھەکە بنگەھێ سەربازی یێ ئینجیرلیک بھێتە ڤالا کرن دێ پەیوەندیێن ھەردو ئالیان بگەھیتە ئاستێ ھەری خراب و دڤێت تورکیا حسابێن خوە باش بکەت و برونسۆنی ئازاد بکەت، دیسان نابیت تورکیا ژ ناتۆیێ بھێتە دەرخستن و پێدڤیا تورکیا ب ناتۆ ھەیە و ناتۆ ژی پێدڤی ب تورکیایە و ئەز باوەر ناکەم د قۆناغا نھا دا تورکیا ژ ناتۆیێ بھێتە دەرخستن و پێنگاڤەکا وەسا دێ تورکیا ب تەمامی نێزیکی روسیا و ئیرانێ کەت).
