وەزیرەکێ بەرێ یێ کارەبێ: وەزارەتا کارەبێ بدەنە من دێ كاره‌بێ كه‌مه 24 ده‌مژمێرى
وەزیرەکێ بەرێ یێ حوکمەتا ھەرێما کوردستانێ وەلاتی و حوکمەتێ پشتڕاست دکەت، ھەکە وەزارەتا کارەبێ بدەنە دەستێ وی، دێ 24 دەمژمێران کارەبێ دەتە وەلاتیان و دیار کر، باشترین سیستەم بۆ کۆنتڕۆلکرنا کارەبێ و زێدەکرنا کارەبا نیشتیمانی بجھئینانا سیستەمێ ئەمپێڕە ل سەرانسەری ھەرێما کوردستانێ.
دووڤچوون، قائید میرۆ
د. ئدریس ھادی، وەزیرێ بەرێ یێ کارەبا ھەرێما کوردستانێ بۆ رۆژناما ئەڤرۆ راگەھاند، ل سەر دەمێ کابینا سیێ یا حوکمەتا ھەرێما کوردستانێ ئەز وەزیرێ کارەبێ بووم، وی دەمی ھەرێم دو ئیدارەبوو، بەھرا پارێزگەھێن ھەولێر و دھۆکێ زۆرا کێم بوو ژ کارەبێ، ب تنێ نێزیکی 80 میگاواتێن کارەبێ بۆ ھەردو پارێزگەھان دھاتنە بەرھەمئینان، وی دەمی من سیستەمێ ئەمپێڕ بجە ئینا و ئەگەر ئەف کارەبا وی سەردەمی بێ ئەمپێڕ ھاتبا بەلافکرن، ب تنێ دا دەمژمێرەکا کارەبێ ھەبیت، بەلێ مە سیستەمێ ئەمپێڕ بۆ ھەر مالەکێ چوار ئەمپێر دیاری کربوون و ئەم شیاین نێزیکی 15 دەمژمێرا کارەبێ بدەینە وەلاتیان.
زێدەتر گۆت: نوکە خواستەکا زێدە ل سەر کارەبێ ھەیە، بەلێ رێژەیەکا زۆرا کارەبێ ژی دھێتە بەرھەمئینان و ب شێوەیەکێ باش ناھێتە بەلافکرن، وەلاتی ژی پێگیری رێنمایێن کارەبێ نینن و ئەف کارەبا دگەھیتە مالێن وەلاتیان ھەموو دھێتە بکارئینان و ھەموو ئامیرێن کارەبێ دھێنە بکارئینان”.
وەزیرێ بەرێ یێ کارەبێ تایبەت بۆ دیار کر ژی” ب دیتنا من سیستەمێ ئەمپێڕ بۆ بەلافکرنا کارەبێ بھێتە بجە ئینان باشترین چارەسەرە، حوکمەت دشێت بۆ ھەر مالەکێ 25 ئەمپێڕ بھێنە دان ب شێوەیەکێ بەردەوام دێ کارەبێ گەھیتە وەلاتیان، ل گۆرەی ئەڤ بەرھەمێ کارەبێ یێ نوکە ھەی، ئەگەر سیستەمێ ئەمپێڕ بھێتە بجە ئینان، ئەڤە دێ شێن 24 دەمژمێران کارەب بگەھیتە وەلاتیان و بێ قوتکرن، ل گەل ڤێ چەندێ دڤێت وەلاتی ژی ھاریکاربن ل گەل وەزارەتا کارەبێ، چونکو ئەگەر وەلاتی ھاریکارنەبن، حوکمەت نەشێت کارەبێ ب دروستی بدەتە وەلاتیان، ئەم دزانین خەلکەکێ زۆر کارەبێ دزن و ب شێوەیێ نەقانوونی کارەب راکێشایە و پێدڤیە بھێتە کۆنتڕۆلکرن، ئەگەر ئەز جارەکا دی ڤەگەڕم وەزارەتا کارەبێ دێ شێم 24 دەمژمێرا کارەبێ دەمە وەلاتیان و یێ پشتڕاستم ژ ئاخفتنا خوە”.
ل دۆر زێدەکرنا بەرھەمێ کارەبێ د. ئیدریس ھادی گۆت “پێدڤیە سالانە حوکمەت بەرھەمێ کارەبێ زێدە بکەت، ژ بەر کو بەردەوام وەلاتی زێدە دبن و پێدڤی ب کارەبا زێدەتر ھەیە، بۆ زێدەکرنێ زۆر رێ ھەنە، ژ وان زێدەکرنا تۆڕێن کارەبێ و سەخبێرکرنا بەردەوام ھەبیت، ب تایبەتی ل تاخێن تێر قەلەبالغ، ھەروەسا زێدەکرنا وێستگەھێن 32 کەیڤی بۆ ڤەگوھاستنا کارەبێ، سالانە دیراسەتا زێدەبوونا رێژەیا وەلاتیان بھێتەکرن و بزانن چەند کارەبێ پێدڤیە، یا ژ ھەموویێ گرنگتر حوکمەت بۆ گەرمکرنێ سوتەمەنیێ بدەتە وەلاتیان و کارەب بۆ مەرەمێن گەرەمکرنێ نەھێتە بکارئینان، ئەز یێ پشتڕاستم ئەگەر ب ڤی شێوەی نوکە بیت حوکمەت نەشێت 24 دەمژمێران کارەبێ بدەتە وەلاتیان، بەرۆڤاژی دانانا سیستەمێ ئەمپێڕ دێ بەردوام کارەب بۆ وەلاتیان ھێتە دابینکرن”.
