وەلاتیێن باکوور ژی ئاوارەیی ھەرێمێ بوون
ئەڤرۆ نيوز:
ب سەدەما ھێرشێن سوپایێ تورکیا بۆ سەر باژارێن باکورێ کوردستانێ و بەردەوامیا شەڕێ ناڤبەرا چەکدارێن پەکەکێ و سوپایێ تورکی، ژمارەکا خێزانێن ئاکنجیێن باژارێ شەمزینان ئاوارەی ھەرێما کوردستانێ بوون.
غەفوور ئەحمەد، قائیمقامێ قەزا مێرگەسۆر راگەھاند چونکی ژیانا خەلکێ باژارێ شەمزینان ژ بەر ھێرشێن سوپایێ تورکیا و شەرێ سوپای ل گەل چەکدارێن پەکەکێ کەفتیە د مەترسیێ دا، ب دەھان وەلاتی ل سنوورێ شەمزینان ئاوارە بوون و گەھشتینە باژارکێ مێرگەسۆر و گۆت “ل گۆر ئامارا ھەتا نھا ٣٨ خێزان کو ژمارا وان دبیتە ٢٤١ کەس ھاتینە مێرگەسۆرێ”.
قائیمقامێ قەزا مێرگەسۆر خویا ژی کر ئەو تشتێ ژ وان بھێت دێ بۆ ڤان ئاوارا کەن، لێ چونکی چ کەمپ ل مێرگەسۆرێ نینن، ڕەنگە ل دەستپێکێ ھندەک گرفت دروست ببن و گۆت “لێ زێدەباری وێ ئێکێ ژی مە ئالیێن پەیوەندیدار ھایدار کرینە کو ھەکە ئەڤ ئاوارەبوونە یا بەردەوام بیت پێدڤیە ئەم خوە بەرھەڤ بکەین و جھەکی بۆ ئاواران ڤەکەین، و ھەر ئاوارەکێ بێت ژی دەرگەھێن مە بۆ دڤەکرینە”.
