وەهبی و سەربەست بۆ كۆپا ئاسیا بەرهەڤییان دكەن
دهێتە چاڤەڕێ كرن ل دەستپێكا هەیڤا بهێت هەردو كوڕێن پارێزگەهێ و یاریزانێن هەلبژارتیێ ئیراقێ وەهبی سلێمان و سەربەست عەبدوللا پشكداری كۆپا ئاسیا یا یارییا پایسكلان بكەن ئەوا دێ ل وەلاتێ كازاخستان بۆ چار ئاستێن جودا هێتە كرن.
هشیار فەریق ئەندامێ كارگێریا یانەیا دهۆك و سەرپەرشتێ یارییا پایسكلان بۆ رۆژنامەیا ئەڤرۆ گۆت: هەردو یاریزانێن پارێزگەهێ وەهبی سلێمان بۆ هەلبژارتیێ ئۆلمپیێ ئیراقێ و سەردار عەبدوللا بۆ هەلبژارتیێ ئیراقێ یێ نشتیمانی دێ پشكداری كۆپا ئاسیا بن ئەوا بڕیارە ل شەشی خزیرانا بهێت وەلاتێ كازاخستان مێڤاندارییا وێ بكەت، ژێگرتنا وان هات پشتی شیایی د هەردو قۆناغێن بۆری یێن قارەمانییا ئیراقێ رێزێن پێشیێ بهێن بۆ یانەیێن خوە سیناعە و كۆیە و مانا خوە دگەل هەلبژارتیێ ئیراقێ مسۆگەر بكەن، ئەڤچەندە ژی بۆ راهێنەرێ وان یێ دهۆكێ تارق سەعید ڤەدگەڕیت ئەوێ بەردەوام راهێنانان پێدكەت و ئاستێ وان بلندكرییە.
ژلایێ خوەڤە وەهبی سلێمان گەشبینییا خوە دیار كر ب دەستڤە ئینانا ئەنجامەكێ باش و گۆت: هەر زوو مە دەست هاڤێژتیە راهێنانان و بەرهەڤییا بۆ قارەمانیێ دكەین سەرباری هەیڤەك یا مایی لێ پشتی قۆناغا دویێ یا قارەمانییا ئیراقێ ب دووماهی هاتی مە بهێنڤەدان نە دانا بەلكو بەردەوام راهێنانان دكەین، ژبەركو قارەمانیەكا بهێزە و باشترین یاریزانێن ئاسیا پشكدارن و بیتە مەزنترین هەڤڕكی ل سەر ئاستێ كێشوەری، گەشبینم هەڤڕكیێ بكەم هەتا دووماهی چڕكە و ب گەهمە ئارمانجا خوە ئەوژی رێزێن ئێكێ هەتا سێیێ بینن سەرباری ئەركێ من ب سانەهی نابیت لێ رژدین بۆ ئەڤێ ئارمانجێ.
