يه‌كگرتوو: دێ هه‌لويستى ل سه‌ر ده‌ست ژ كاركێشانا ديندار نه‌جمان وه‌رگرين
ئه‌ڤرۆ نيوز، نيوار محه‌مه‌د سه‌ليم:
به‌رپرسێ مه‌لبه‌ندێ سێ يێ يه‌كگرتوو ئيسلامى كوردستانێ ل دهۆكێ راگه‌هاند كو دكتور ديندار وه‌كو ئالايه‌كى بوويه د ناڤ يه‌كگرتوو دا و ئه‌و ب مامۆستايێ خوه دزانن و دێ هه‌لويسته‌كى راگه‌هيننن.
د. محه‌مه‌د مسته‌فا، به‌رپرسێ مه‌لبه‌ندێ سێ يێ يه‌كگرتوو ئيسلامى كوردستان ل پارێزگه‌ها دهۆكێ بۆ ئه‌ڤرۆ نيوز گۆت: “بۆ مه گه‌له‌ك نه‌خۆش بوويه كو دكتور ديندار ده‌ست ژ كاركێشانا خوه راگه‌هاندى، ئه‌و وه‌كو ئالايه‌كى بوويه د ناڤ يه‌كگرتوو دا و ب مامۆستايێ خوه د زانين”.
زێده‌تر گۆت: “دكتورى چه‌ندين جاران نه‌ره‌حه‌تيا خوه ل دۆر هه‌لويستێن براده‌رێن يه‌كگرتوو ل سلێمانيێ ده‌ربڕيه و به‌حس ل ده‌ست ژ كاركێشانا خوه كريه هه‌تا كو ئه‌ڤرۆ ئه‌ڤ بڕياره راگه‌هاندى”.
ئاماژه ب و چه‌ندێ ژى كر كو پێدڤى پتر خوه راگرت با و بڕياره‌كا ژ ڤى ره‌نگى نه‌دابا ژ به‌ر پێدڤيا يه‌كگرتوو ب وى و گۆت: “ئه‌م هه‌موو ل هه‌مبه‌ر ئه‌ڤ كارێ ل سلێمانيێ دهێته كرن د بهێن ته‌نگ و نه‌رازى نه”.
به‌رپرسێ مه‌لبه‌ندێ سێ يێ يه‌كگرتوو ئيسلامى كوردستانێ ل دهۆكێ دا زانين ژى كو يه‌كگرتوو د هنده‌ك هه‌لويستان دا دڤێت ب هشيارى سه‌ره‌ده‌ريێ بكه‌ت چونكو ل دهۆك و سلێمانيێ هه‌ردويان جه‌ماوه‌رێ خوه يێ هه‌يى وب تايبه‌ت ل پارێزگه‌ها دهۆكێ ليستا دويێ يه.
نه‌ڤه‌شارت ژى كو دڤێت ئه‌و هه‌ڤسه‌نگيێ بێخنه هه‌ردو پارێزگه‌هان و گۆت: “بۆ لايه‌نه‌كێ وه‌كو گۆڕان دهۆك يا گرنگ نيه و گرنگيێ ب ده‌نگده‌رێ ڤێره ناده‌ت چونكو سه‌نگا خوه ل ڤێره نينه، به‌لێ دڤێت يه‌كگرتوو ب هشيارى ڤێ سه‌ره‌ده‌ريێ بكه‌ت”.
د. محه‌مه‌د مسته‌فا ده‌رباره‌ى جودابوونا يه‌كگرتوويێن پارێزگه‌ها دهۆكێ ژ يه‌كگرتوو ئيسلامى كوردستان گۆت: “هێشتا مه چو بڕيارێن فه‌رمى نه‌داينه و دێ كۆمبوونا جڤاتێ كه‌ين و تێدا بڕيارێ ل سه‌ر دانا هه‌لويسته‌كى ل سه‌ر ده‌ست ژ كار كێشانا دكتورى و وى بابه‌تى ب روونى ده‌ين، چونكو ده‌ست ژ كاركێشانا دكتور ديندار نه‌جمان ئه‌م گه‌له‌ك يێن نه‌ره‌حه‌ت كرين”.
ل دووماهيێ ژى گۆت: “يه‌كگرتوو نوونه‌رێ خوه نينه بۆ سه‌رۆكاتيا هه‌رێمێ و پێدڤى بوو ل سه‌ر وێ هه‌ڤسه‌نيگا خوه راگرت با و پشته‌ڤانيا چو لايه‌نان نه‌كربا ب تايبه‌ت ژى ئه‌وا فراكسيۆنا يه‌كگرتوو ل په‌رله‌مانى كرى دژى بڕيارا سه‌ركرداتيێ بوو و ژ به‌ر هندێ ژى يه‌كگرتوو هه‌لويست وه‌رگرت و ئه‌و به‌ياننامه به‌لاڤكر”.
د. ديندار نه‌جمان دوسكى ئه‌ندامێ سه‌ركرداتيا يه‌كگرتوو ئيسلامى كوردستان و ده‌مه‌زرێنه‌رێ وێ حزبێ ژ به‌ر زالبوونا بڕيارا لايه‌نگرێن وێ حزبێ ل سلێمانيێ ل سه‌ر بڕيارا يه‌كگرتوو ده‌ست ژ كار كێشانا خوه ژ وێ حزبێ راگه‌هاند.
