ئيران: دێ وه‌كو هه‌ڤال بۆ كوردان مينين
ئه‌ڤرۆ نيوز:
وه‌زيرێ ژ ده‌رڤه يێ ئيرانێ راگه‌هاند، سه‌ره‌راى ريفراندۆمێ و بزاڤێن وان بۆ جودا بوون ژ عيراقێ، وه‌لاتێ وان دێ وه‌كو هه‌ڤالێن كوردان مينن.
د هه‌ڤپه‌يڤينه‌كێ دا ل گه‌ل ناڤه‌ندا ئاسيا ل نيويورك، محه‌مه‌د جه‌واد زه‌ريف راگه‌هاند: “وه‌سان هزر دكه‌ين كو ئه‌و ريفراندۆما هاتيه كرن يان خه‌له‌ت بوو، به‌لێ وه‌كو گه‌لێ ئيرانێ دێ هه‌ڤالێن ناڤخۆ يێ كوردان مينين، وه‌سان ژى هزر دكه‌ين كو خه‌له‌تيه‌كا ستراتيژى يا مه‌زن بوو”.
جه‌واد زه‌ريف د بێژيت: “كورد هه‌ڤالێن هه‌رده‌مى يێن مه‌نه، هه‌ر وه‌كو من نها ژى گۆتى، ئه‌م چووينه هه‌ولێر بۆ هاريكاريا كوردان ده‌مێ ئه‌وان ل دژى داعش شه‌ر دكر و مه رێگرى ل داگيركرنا هه‌ولێر كر”.
زه‌ريف پێشبينيا وێ چه‌ندێ دكه‌ت كو كارتێكرنێن ريفراندۆمێ ب تنێ ل هه‌رێما كوردستانێ نه‌بن، به‌لكۆ ل ده‌ڤه‌رێن دژى ڤه‌گرن. راگه‌هاند ژى ريفراندۆم مه‌ترسيه ل سه‌ر ئاراميا ده‌ڤه‌رێ و خزمه‌تا به‌رژه‌وه‌نديێن كوردان ژى ناكه‌ت.
ئيرانێ به‌رى ريفراندۆمێ دژاتيا خوه بۆ ب رێڤه‌چوونا ريفراندۆمێ ده‌ربڕى، رۆژا چارشه‌مبى 27ى ئيلۆنا 2017ێ په‌رله‌مانێ ئيرانێ ب ئاماده‌بوونا سكرتێرێ جڤاتا ئاسايشا نشتيمانى يا ئيرانێ ريفراندۆما كوردستانێ ب نه قانوونى وه‌سفكر.