يێ نه‌چيته شه‌رى دێ مليۆن و نيڤان ده‌ته داعش
ئه‌ڤرۆ نيوز، رزوان رۆژبه‌يانى:
به‌رپرسێ راگه‌هاندنێ ل لقا 14 يا پارتى ديموكراتى كوردستان راگه‌هاند كو داعش ئه‌ڤرۆ ژى بزاڤ دكرن خه‌لكى ب زوورى دبنه شه‌رى و يێ نه‌چيت ژى هه‌ر كه‌سى مليۆن و نيڤان ژێ وه‌ردگرن.
سه‌عيد مه‌موزينى به‌رپرسێ راگه‌هاندنا لقا 14 يا پارتى ديموكراتى كوردستان بۆ ئه‌ڤرۆ نيوز گۆت: “به‌رده‌وام چه‌كدارێن داعش ب زۆرى خوينێ ژ وه‌لاتيان دكێشن و دده‌نه بريندارێن خوه و نوكه يێ نه‌چيته شه‌رى ژى پێدڤيه پاره‌يى بده‌ت”.
زێده‌تر گۆت: “بۆ هه‌ر كه‌سى مليۆن و نيڤان ژێ وه‌ردگرن و يێ نه‌بيت ژى دكه‌نه د زيندانێ دا و هه‌تا نوكه نێزيكى 30 كه‌سان كرينه د زيندانان دا و كه‌س نوزانيت ژى ل كيرێ هاتينه زيندانكرن”.
ئاشكه‌را ژى كر كو هه‌ر ئه‌ڤرۆ چه‌كدارێن داعش ل ده‌وروبه‌رێن مووسل ده‌ست ب لێدانا خه‌نده‌كان كريه دا كو خوه ژ هێرشێن په‌ياده ب پارێزيت ب تايبه‌ت پشتى هاتيه راگه‌هاندن كو نوكه به‌رهه‌ڤى بۆ ئازادكرنا مووسل دهێنه كرن.
نه‌ڤه‌شارت ژى كو هژماره‌كا زێده يا چه‌كدارێن داعش چه‌كێن خوه هاڤێتينه و ره‌ڤينه و نه‌ڤێن بچنه شه‌رى ژ ترسا هێرش كرنا سه‌ر مووسل.
