٨٠% ھاریکاریێن رێکخراوان بۆ ئاوارە و پەنابەرێن ل زاخۆ کێمبووینە
ئەڤرۆ نیوز، عەلی حاجی:
ب ھەلکەفتا رۆژا جیھانی یا پەنابەران، رێکخراوا قەندیل ئاھەنگەک بۆ ھژمارەکا پەنابەرێن ل سنوورێ قەزا زاخۆ ئاکنجی ساز کر، بەرپرسێ پەنابەر و ئاواران ل قایمقامیا قەزا زاخۆ ژی دیار دکەت کو ٨٠% ھاریکاریێن رێکخراوان بۆ ئاوارە و پەنابەرێن ل زاخۆ کێمبووینە.
خەلات ئوسمان، بەرپرسێ ئاوارە و پەنابەران ل قایمقامیا زاخۆ بۆ ئەڤرۆ نیوز گۆت: “زێدەتری ۱۰۸ ھزار پەنابەر و ئاوارە د ناڤ کەمپ و سەنتەرێ باژێرێ زاخۆ دا د ئاکنجی نە، پشتی رزگارکرنا دەڤەرێن نەینەوا دەلیڤێن کاری و رێژەیا ھاریکاریێن رێکخراوا بۆ ئاوارە و پەنابەران ب رێژەیا ٨٠% د ئەڤ سالە دا کێمبووینە، ژ بەر کو رێکخراوێن ھاریکاری بەلاڤ دکرن، نوکە قەستا دەڤەرێن نەینەوا کرینە و زێدەباری وێ چەندێ رێژا زۆرا ئاوارە و پەنابەران ل زاخۆیە”.
گۆتژی: “ب تنێ ھندەک دەزگەە و رێکخراوێن ناڤخویی د نوکە دا ھاریکاریان ل سەر وان ئاواران بەلاڤ دکەن و وەزارەتا کۆچ و کۆچبەرێن عیراقێ د بیاڤێ گەھاندنا ھاریکاریان دا گەلەکا خەمسارە”.
ناڤبری ئەو چەندە ژی ئاشکرا کر، ھژمارەکا کێم یا ئاواران کو ٤٠٠ خێزان بووینە ڤەگەڕیاینە دەڤەرێن خوە، ئەو ژی جۆتیار بووینە، دا کو ئەردێ وان ژ دەست وان نەچیت نەچار بووینە ڤەگەڕیاینە دەڤەرێن خوە و گۆت: “ئاوارێن دەڤەرێن ماددێ ١٤٠ ناخوازن ڤەگەڕنە دەڤەرێن خوە، ژ بەر کو دەڤەرێن وان د ئارام نینن، ژ لایێ خوەڤە ژی حوکمەتا ھەرێمێ خەمساری نەکری یە و دکەرتێن ساخلەمی و کارەب و ئاڤ و گەلەک کەرتێن دی دا ھاریکاری گەھاندینە ئاوارە و پەنابەران ل زاخۆ”.
