پاراستنا قەوارەیێ هەرێما کوردستانێ د ناڤبەرا ئێکڕێزییا نیشتیمانی و ژیرییا ستراتیژییا پارتی دا
ژڤان عەلی
د سەردەمەكی دا كو رۆژهەلاتا ناڤەراست د قووناغەكا نەدیار و پڕ ژ وەرچەرخانێن بلەز و ئاڵوز دا دەربازدبیت، دارشتنا تێگەهەكا رۆهن و ستراتیژی بۆ هەرێما كوردستانێ و پاراستنا قەوارەیێ وێ، پێدڤی ب ئێكگرتنەكا نیشتیمانی یە، پارتی دیموكراتی كوردستان وەكو هێزا ئێكێ ل هەرێما كوردستانێ مێژوو و خەباتا وێ بەلگەیەكێ زیندی یە ل سەر سیاسەتا ڤێ پارتێ د پاراستنا قەوارەیێ هەرێما كوردستانێ دا و دەستەبەركرنا ئارامی و ئاڤەدانیێ ل هەرێما كوردستانێ، سەرەرای هەبوونا ب دەهان كێشە و قەیران و دۆخێن نەچاڤەرێكری، لێ ئێك ژ پرەنسیپێن نەگوهۆر و باوەرپێكری ل دەڤ پارتی پاراستنا ماف و داخوازیێن گەلێ كوردستانێ یە ب درێژاهییا قووناغێن حوكمرانیێ دا بوویە سەرپشكا پارێزەرا قەوارەیێ هەرێمێ و ئاڤەدانی و ڤەژاندن و پێشڤەچوونا كوردستانێ و شیا د ناڤ وان هەمی ئالۆزیێن ل رۆژهەلاتا ناڤەراست دا هەیین ب دیبلۆماسیەتەكا ژیرانە كوردستانێ وەكو نموونەیەكا بەرز ژ پاراستنا سەقامگێری و هەڤسەنگیا سیاسی و ئاخا كوردستانێ ژ ململانێ و ئالۆزیێن دەڤەرێ بپارێزیت و وەكو ناڤەندەكا جێگیر ژبۆ ئاشتیێ بهێلیت، پارتی هەردەم ئەركێ مەزنێ نیشتیمانی ل سەر ملێن خۆ هەلگرتیە د هەمی قووناغێن سەخت دا، ئەگەر بتنێ ژی مابیت ملێن خۆ داینە بەر بەرپرسیارەتیێ ل ناڤخۆیا كوردستانێ دا ژبۆ رێكخستنا ناڤمالا كوردی، هەردەم ئامادەییا خۆ دیاركرییە و هەمی ئاسانكاری و هەڤكاری كرینە پارتی هەردەم خوازیارە ب هەماهەنگیا سەرجەم لایەنێن سیاسی ئەركێن نشتیمانی د بەرژەوەندیا گەلێ كوردستانێ دا بهێنە ئەنجامدان ل پێناڤ وێ چەندێ ئەڤ قووناغا هەستیار و چارەنڤێساز ب ئێك دەنگ و ئێك هەلوەست بهێتە دەربازكرن، چونكی پاراستنا قەوارەیێ هەرێما كودستانێ ژناڤخۆیا هەرێمێ دەست پێ دكەت ململانا سیاسی و جیاوازیا بیرۆرایان هەر چاوا بیت نابیت ببنە ئەگەرێ لاوازكرنا پێگەهێ یاسایی و دەستووریێ هەرێما كوردستانێ ل سەر ئاستێ ناڤخۆ د ڤێ قووناغا هەستیار دا گرنگە لایەنێن سیاسیێن كوردستانێ پرەنسیپێن ئێكرێزی و ئێكهەلوەستیێ ب هەند وەربگرن و هەمی د چارچووڤێ ئێك گۆتارا سیاسی نەتەوەیی و نشتیمانی پێنگاڤان بهاڤێژن و رووی ب رووی ئالۆزیان ببن ل پێناڤی بەرگریكرن ژ مافێن دەستووری یێن هەرێما كوردستانێ، ل سەر ئاستێ دەڤەرێ هەرێما كوردستانێ، د ڤێ قووناغێ دا پێدڤی ب دروستكرنا پەیوەندیێن فرەلایەن و جۆراوجۆر و هەڤسەنگ هەیە ل گەل وەلاتێن جیران و حوكمەتا فیدرال و هەڤپشكێن خۆ یێن نێڤدەولەتی ب رەنگەكی ب هێزكرنا پەیوەندیان ل گەل لایەنەكی نەبیتە ئەگەرێ دروستبوونا كێشە و ئالۆزیان ل گەل لایەنەكێ دیتر و زیان ب ئاسایش و بەرژەوەندیێن هەرێمێ بگەهیت، چونكی سیاسەتا راستی دا هەڤالێ هەردەم و دوژمنێ هەردەم د هەبوونێ دا نینە، ئەوا هەی بتنێ بەرژەوەندیێن درێژخایەنن ب تایبەتی پشتی ڤەكێشانا هێزێن ویلایەتێن ئێكگرتیێن ئەمریكا و هەڤپەیمانێن نێڤدەولەتی ل ئیراقێ دەڤەر ب گشتی د قووناغەكا هەستیارا سیاسی و ئەمنی دا دەربازدبیت لایەنێن سیاسیێن كوردستان ژی د ڤێ قووناغێ دا پتر ژ هەر دەمەكی پێدڤی بهێزكرنا دیالۆگا نیشتیمانی هەیە ئێك دەنگ بن ل سەر دروستكرنا میكانیزمەكا نیشتیمانی بۆ پاراستن و رێگریكرن ب هەر هەولەكا ژبۆ زیانگەهاندنێ ب ماف و بەرژەوەندیێن هەرێمێ بگەهینیت د ئەزموونا چەندین سالێن دەربازبووی دا، ئەڤ چەندە دوپات بوویە بتنێ گەلێ كورد ب ئێكدەنگیێ و ب ئێك گۆتارا سیاسی، دێ شێت ل دەڤەرەكا پڕی گورانكاری و ململانێن سیاسی بەرگریێ ژ قەوارەیێ هەرێما كوردستانێ و مافێن گەلێ كورد و مسۆگەركرنا داهاتیەكێ ئارام بۆ كوردستانێ بكەت، بەروڤاژی هەر دابەشبوونەكا ناڤخۆیێ د ڤێ قووناغا هەستیار دا رێخوشكەرە ژبۆ پێشلكارێن زێدەتر و لاوازكرنا پێگەهێ سیاسیێ كوردان، بێگومان سەنگ و پێگەهێ مێژوویی سەرۆك (مسعود بارزانی) وەكو سەركردەیەكێ كارێزمایێ نیشتیمانی رۆلێ جەنابێ وان دچەسپاندن و تەباكرنا لایەنێن سیاسیێن كوردستانێ و راگرتنا بالانسا سیاسی و كولتوورێ پێكڤەژیانا ئاشتیانە بوویە ئەگەر كوردستان ببیتە پەناگەهەكا ئارام بۆ هەمی پێكهاتێن ئایینی و نەتەوەیی و نموونەكا بەرچاڤ ل دەڤەرێ بۆ ئاشتیێ و ئارامیێ، یا خویایە قەوارەیێ دەستووری یێ هەرێما كوردستانێ شكۆ خوینا شەهیدانە بەرهەمێ دەهان سالێن خەبات و قوربانیدانا گەلێ كوردستانێ یە، لەورا هەر هەولەكا بۆ لاوازكرنا ڤی قەوارەیی بهێتە كرن تێكدانا بنەمایێن نیشتیمانی و نەتەوەیی یە و شكاندنا ئیرادیێ یە بەرامبەر مێژوویا نەتەوەیەكی بۆ مە وەكو هەرێما كوردستانێ پەیرەوكرنا ستراتیژیەت و سیاسەتا پاراستنا بەرژەوەندیێن باڵا یێن گەلێ كوردستانێ و قەوارەیێ سیاسیێ هەرێمێ ل سەر هەمی بەرژەوەندیێن دیترە، گرنگە هەمی لایەنێن سیاسی خالێن خۆیێن جودا ل لایەكی بهێلن و پابەندی پرەنسیپێن گەل و نیشتیمانی بن، بۆ وێ چەندێ هەر گوهۆرینەك یان مەترسیەكا نەچاڤەریكری بهێتە پێشی گەلێ كورد ب كێمترین زیان ژێ دەربازببیت ب شێوەیەكێ گشتی ئەڤ شێوازێ حوكمرانیێ ل كوردستانێ ئاماژەكا روونە ب ئیرادەیەكا بهێز و پوڵایین و خواندنەكا هویربین و ژیرانەیا بۆ پێشهاتێن دەڤەرێ ب رەنگەكی هەڤسەنگی پاراستییە و پارێزگاری ژ سەروەریا هەرێما كوردستانێ كریە، ل پێناڤ داهاتیەكێ گەشتر و كوردستانەكا ئاڤەدانتر، بۆ داهاتەكێ باشتر گرنگە ل ناڤخۆیا هەرێما كوردستانێ تێگەهشتنەكا هەڤپشك ل سەر مەترسی و دەستكەفتێن نیشتیمانی دروست ببیت، هەتاكو كوردستان ل گۆرەپانا رویدان و پێشهاتێن دەڤەرێ و جیهانێ ب هێز و كاریگەرتر دیاربیت.
