پارتا بزاڤا نەتەوەپەرست یا تورکیا داخوازا سزادانا ئەحمەد تورک دکەت
جێگرێ سەرۆکێ پارتا بزاڤا نەتەوەپەرست یا تورکیا راگەهاند، دڤێت ئەحمەد تورک ژ پۆستێ سەرۆکاتیا باژێرڤانیا مێردینێ بهێتە دوورخستن، چونکی ل تورکیا ئالا و سرودا نەتەوەیی هێلێن سۆرن و دەمێ ئەحمەد تورک دەست ب کارێ خوە کری سرودا نەتەوەیی یا کۆمارا تورکیا نەهاتیە خواندن.
سەمیح یالچین جێگرێ سەرۆکێ پارتا بزاڤا نەتەوەپەرست یا تورکیا دیار کر، دڤێت هەر زوو ئەحمەد تورک ژ سەرۆکاتیا باژێرڤانیا مێردینێ بهێتە دوورخستن، چونکی ل تورکیا هندک تشت هێلێن سۆرن، ئالا تورکیا و سرودا نەتەوەیی یا کۆمارا تورکیا هێلێن سۆرن و یێن بێ رێزیێ ل ئالایێ تورکیا و سرودا نەتەوەیی یا کۆمارا تورکیا بکەن دڤێت بهێنە سزادان و گۆت: (دەمێ ئەحمەد تورک وەکو سەرۆکێ باژێرڤانیا مێردینێ دەست ب کارێ خوە کری، د رێورەسمێ دا سرودا نەتەوەیی یا تورکیا نەهاتیە خواندن و سڤکاتی ژی ب ئالایێ تورکیا هاتە کرن، هەرچەندە ژ ئالیێ وەزارەتا ناڤخوە یا تورکیا ل دۆر هەمان بابەتی ڤەکۆلینێ دەستپێکریە، لێ ئەو یەک تێر ناکەت و دڤێت هەر زوو ئەحمەد تورک ژ پۆستێ سەرۆکاتیا باژێرڤانیا مێردینێ بهێتە دوورخستن).
ئەو یەک د دەمەکێ دایە کو بەری چەند رۆژان رەجەب تەیب ئەردۆغانێ سەرۆک کۆمارێ تورکیا ژی راگەهاند، هندەک ژ سەرۆکێن باژێرڤانیان یێن سەر ب پارتا دەم بێ رێزیێ ب بهایێن کۆمارا تورکیا دکەن، ئەو یەک ژ ئالیێ گەلێ تورکیا ڤە ب چو رەنگەکێ ناهێتە قەبوول کرن و یێن رێزێ ل بهایێن تورکیا نەگرن دێ گەهنە سزایێن خوە و گۆت: (بەری نها ژی یێن ئاریشە دروست کرن ژ کاری هاتنە دوورخستن و ب جهێ وان قەیوم هاتنە دانان، نها ژی ئەم دشێین هەمان تشتی بکەن، چونکی ل تورکیا هەر کەس نەچارە رێزێ ل وان بهایان بگریت یێن بۆ مە هێلێن سۆرن و نابیت کەس زێدەگاڤیان بکەت).
چاڤدێرێن سیاسی ژی دیار دکەن، ئاکپارتی و پارتا بزاڤا نەتەوەپەرست هەر پشتی هەلبژارتنێن باژێرڤانیان یێ کار دکەن دا هندەک ژ سەرۆکێن باژێرڤانیێن باژێرێن کوردی ژ دەستێ کوردان دەرخینن و جارەکا دی ب جهێ وان قەیومان دانێن، چونکی د هەلبژارتنێن باژێرڤانیان دا ئاکپارتی و پارتا بزاڤا نەتەوەپەرست تووشی شکەستنێ هاتن و دخوازن ب رێیا قەیومان هندەک ژ باژێرڤانیان بکەنە ژێر کۆنترۆلا خوە.
ئۆزگور ئۆزەل سەرۆکێ پارتا کۆماری یا تورکیا ژی راگەهاند، ئەو وەکو پارتا کۆماری سیاسەتا قەیومان ب توندی رەت دکەن، دڤێت ئاکپارتی رێزێ ل دەنگێن خەلکی بگریت، دانانا قەیومان شەرمەکا مەزنە بۆ تورکیا، دڤێت ئاکپارتی دەست ژ سیاسەتا قەیومان بەردەت و راستیا هەی قەبوول بکەت، د هەلبژارتنان دا ئاکپارتی تووشی شکەستنەکا مەزن بوو و دڤێت ب رێیا قەیومان نەبیتە ئەگەرێ هندێ رەوشا تورکیا پتر ئالۆز ببیت.
