پارتى بۆ زامنكرنا مووچێ فه‌رمانبه‌ران سه‌ره‌دانا زێده‌ترى 30 حزب و فراكسيۆنا كريه
ئه‌ڤرۆ نيوز، نيوار محه‌مه‌د سه‌ليم:
سه‌رۆكا فراكسۆنا پارتى ديموكراتى كوردستان ل جڤاتا نوونه‌رێن عيراقێ راگه‌هاند كو گه‌له‌ك گڤاشتن ل سه‌ر بزاڤێن كوردان هه‌نه و بزاڤێ دكه‌ن مووچێ فه‌رمانبه‌ر و پێشمه‌رگه‌ى و خێزانێن شه‌هيد و زيندانيێن سياسى بێ مه‌رج بێخنه ناڤ بوودجێ و ل گه‌ل زێده‌تر ژ 30 لايه‌نێن سياسى ژى روونشتينه بۆ رازيكرنا وێ چه‌ندێ.
د. ڤيان سه‌برى، سه‌رۆكا فراكسۆنا پارتى ديموكراتى كوردستان ل جڤاتا نوونه‌رێن عيراقێ، د داخۆيانيه‌كێ دا بۆ ئه‌ڤرۆ نيوز گۆت: “گه‌له‌ك گڤاشتن يێ ل سه‌ر تێبينيێن مه هه‌ين، بزاڤێن مه ژى د رژدن، تێبينى ل ده‌سپێكێ ل سه‌ر رێژێ بوون، رێژه نه‌يا دروست بوو. نها به‌حس ل هوورده‌كاريێن بوودجێ دهێته كرن، ئه‌و بۆ هه‌رێما كوردستانێ گه‌له‌ك يا گرنگه، زانمكرنا مووچێن هه‌رێما كوردستانێ، مووچێ فه‌رمانبه‌ر و پێشمه‌رگێن كوردستانێ ب هه‌يڤانه و ره‌نگه‌كێ دروست بهێته به‌لاڤكرن، بێى گرێدانا وێ ب چو بابه‌تێن سياسى ڤه، دارشتنه‌كێ په‌يدا كه‌ن د ناڤ بوودجێ دا كو مووچێن فه‌رمانبه‌ر و پێشمه‌رگان و مووچێ خێزانێن شه‌هيدان و زيندانيێن سياسى ب دروستى بهێته دابينكرن”.
زێده‌تر گۆت: “كێمكرنا مه‌زاختيێن سيادى گه‌له‌ك يا گرنگه، زامنكرنا مه‌زاختيێن حاكم گه‌له‌ك يا گرنگه دروست و ب ده‌مێ خوه بهێت چونكو بۆ نموونه نها و پێشتر ژى 17% ژ رێژا ده‌مان بۆ هه‌رێما كوردستانێ دهاته دياركرن، به‌لێ د راستى دا 40%ێ ژ وێ رێژێ نه‌دگه‌هشت”.
نه‌ڤه‌شارت ژى كو خالا (ج) گه‌له‌ك تێبينى و دانوستاندن يێن ل سه‌ر هه‌ين كا دێ هه‌ر وه‌كو خوه د بوودجێ دا مينيت يان ژى دێ هێته راستڤه‌كرن و گۆت: “مه دڤێت هه‌رێم يا پابه‌ند نه‌بيت ب 250 به‌رميلێن په‌ترۆلێ و پێڤه‌گرێدانا وێ ب مووچێ فه‌رمانبه‌ر و پێشمه‌رگه و خێزانێن شه‌هيد و زيندانيێن سياسى”.
د. ڤيان سه‌برى خۆيا كر ژى كو دابينكرنا مه‌زاختيێن پێشمه‌رگه‌ى د چارچۆڤێ مه‌زاختيێن له‌شكرێ عيراقێ دا ژى ژ وان كارايه يێن ب رژدى كار ل سه‌ر دكه‌ن، “پێشمه‌رگه ژى پشكه‌كه ژ پێكهاتێ له‌شكرى يێ عيراقێ”.
سه‌رۆكا فراكسۆنا پارتى ديموكراتى كوردستان ل جڤاتا نوونه‌رێن عيراقێ گۆت: “ئه‌ڤه ماوه‌كه ئه‌م وه‌كو پارتى ديموكراتى كوردستان ل گه‌ل شانده‌كێ هه‌رێما كوردستانێ مه سه‌ره‌دانا لايه‌نێن سياسى و هه‌ڤپه‌يمانى و كه‌ساتيێن سياسى يا كرى دا كو ره‌وشا هه‌رێما كوردستانێ بۆ وان به‌حس بكه‌ين و رازى كه‌ن ل سه‌ر ڤێ چه‌ندێ كو مووچێ فه‌رمانبه‌ران و پێشمه‌رگه‌ى مافه‌كێ سرۆشتى يه”.
گۆتژى: “ل گه‌ل فراكسيۆنێن كوردستانى ژى كۆمبوونه‌كا به‌رفره‌هـ هاتيه كرن كو شه‌ش لايه‌نێن سياسى ژ بلى نه‌وه‌ى نوێ پشكدار ببوون و ئه‌ڤ هه‌موو بۆچوونه يێن هاتينه گه‌نگه‌شه كرن”.
