پارتى داخوازا زوو په‌سه‌ندكرنا قانوونا چاكسازيێ د خانه‌نشينيێ ومووچه‌ى وده‌رمالان دا دكه‌ت
ئه‌ڤرۆنيوز:
فراكسيۆنا پارتى ديموكراتى كوردستان ل په‌رله‌مانێ كوردستانێ، دبه‌ياننامه‌كێ دا داخواز دكه‌ت سه‌رۆكاتيا په‌رله‌مانێ كوردستانێ ب زووترين ده‌م كارێ پێدڤى بكه‌ت بۆ ئه‌نجامدانا روونشتنه‌كا نه‌ئاسايى يا په‌رله‌مانێ كوردستانێ.
ئه‌ڤرۆ شه‌مبيێ 31/3/2018، فراكسيۆنا پارتى ديموكراتى كوردستان ل په‌رله‌مانێ كوردستانێ به‌ياننامه‌كێ دا، دياركر كو ئه‌ڤ شێوازێ نوو يێ سيسته‌مێ مووچه‌ى دبه‌رژه‌وه‌نديا وه‌لاتيان دايه ووه‌كو فراكسيۆنا پارتى زێده‌بارى ده‌ربرينا رێزێ به‌رامبه‌ر مووچه‌خۆران ووه‌لاتيێن هه‌رێما كوردستانێ، پشته‌ڤانيێ ل ڤێ پێنگاڤا گرنگ يا حوكمه‌تا هه‌رێما كوردستانێ دكه‌ين.
د وێ به‌ياننامێ دا هاتيه ژى كو فراكسيۆنا پارتى به‌رده‌وام پشته‌ڤانيێ ل پرۆسا چاكسازيا راسته‌قينه وب دامه‌زراوه‌كرنا هه‌رێما كوردستانێ دكه‌ت، له‌وما داخوازێ ژ سه‌رۆكاتيا په‌رله‌مانێ كوردستاني دكه‌ين كو ب زووترين ده‌م كارێ پێدڤى بۆ ئه‌نجامدانا روونشتنه‌كا نه‌ئاسايى يا په‌رله‌مانى بهێته كرن وهه‌ر چ زوويه قانوونا چاكسازيێ دخانه‌نشينيێ ومووچه‌ى وده‌رمالان وبه‌خشن وئيمتيازاتێن دى ل هه‌رێما كوردستانێ بهێته په‌سه‌ندكرن.
خوياكر ژى، ب په‌سه‌ندكرنا ڤێ قانوونێ دێ پێنگاڤه‌كا دى ژ پرۆسه‌كێ نێزيك بين كو دووماهى ب ڤێ قه‌يرانێ دێ ئينيت كو دڤى ده‌مى دا تووشى هه‌رێما كوردستانێ بووى.
