پارتى دخوازيت ئێكه‌تيێ بۆ ئه‌نجامدانا هه‌لبژارتنان رازى بكه‌ت
ئه‌ڤرۆنيوز:
ژێده‌ره‌كێ بلند ئاشكرا دكه‌ت كو دكۆمبوونا ئه‌ڤرۆ يا هه‌ردو مه‌كته‌بێن سياسى يێن پارتى وئێكه‌تيێ دا، ئێكه‌تى داخوازا پاشخستنا هه‌لبژارتنان دكه‌ت وپارتى بزاڤێ دكه‌ت ئێكه‌تى ب ئه‌نجامدانا هه‌لبژارتنان رازى ببيت.
ژێده‌ره‌كێ بلند بۆ باسنيوز راگه‌هاند”ئه‌ڤ كۆمبوونه ل سه‌ر پێشنيازا ئێكه‌تيێ بوو وئێك ژ داخوازيێن ئێكه‌تيێ ژپارتى ئه‌وه كو هه‌لبژارتن بهێنه پاشخستن”.
ل دۆر وێ چه‌ندێ، ئاراس حه‌سۆ ميرخان، ئه‌ندامێ سه‌ركردايه‌تيا پارتى گۆت” ئێكه‌تى ل گه‌ل هه‌لبژارتنان نينه دڤێ قۆناغێ دا، له‌وما هه‌تا نوكه رۆژا هه‌لبژارتنان نه‌هاتيه دياركرن، چونكى ئێكه‌تى دگه‌لدا نه‌بوو”.
دياركر ژى” پارتى يا رژده ل سه‌ر وێ چه‌ندێ كو پێدڤيه رۆژا هه‌لبژارتنان بهێته دياركرن، هيڤيدارين قه‌ناعه‌تێ بۆ دروست بكه‌ن، هه‌كه نه‌هاته كرن، دكۆمبوونه‌كا په‌رله‌مانى دا، يان ل جهه‌كێ دى بريار دێ هێته دان”.
ئاماژه دا” ئێك ژ سه‌ره‌كى ترين بژارده بۆ دانوستاندنێن ئه‌ڤرۆ يێن پارتى وئێكه‌تيێ ئه‌وه كو پارتى بزاڤێ دكه‌ت باوه‌ريێ بۆ ئێكه‌تيێ په‌يدابكه‌ت بۆ وێ چه‌ندێ هه‌لبژارتن بهێنه ئه‌نجامدان ورۆژه‌ك بهێته دياركرن بۆ هه‌لبژارتنان”.
