پارتى دێ سه‌ره‌دانا هه‌موو لایه‌نێن سیاسى كه‌ت
ئه‌ڤرۆنیوز:
ب سه‌رپه‌رشتیا سه‌رۆك مه‌سعود بارزانى، ئه‌ڤرۆ ئێكشه‌مبى 10/3/2019 جڤاتا سه‌ركردایه‌تیا پارتى دیموكراتى كوردستان كۆمبوو.
د وێ كۆمبوونێ دا دووماهى گاڤێن پێكئینانا كابینا نوو یا حوكمه‌تا هه‌رێما كوردستانێ، زێده‌بارى رێككه‌فتنا سیاسى ل گه‌ل بزاڤا گۆران ورێككه‌فتنا سیاسى ل گه‌ل ئێكه‌تیێ هاتن به‌حسكرن.
پشتى كۆمبوونێ مه‌حموود محه‌مه‌د ئه‌ندامێ مه‌كته‌با سیاسى وپه‌یڤدارێ پارتى دكۆنگره‌كێ رۆژنامه‌ڤانى دا ل دۆر كۆمبوونا ئه‌ڤرۆ یا جڤاتا سه‌ركردایه‌تیا پارتى به‌حسێ چه‌ند خالان كر وراگه‌هاند كو ل دۆر رێككه‌فتنێن پارتى ل گه‌ل گۆران وئێكه‌تیێ دانوستاندن هاته كرن .
په‌یڤدارێ پارتى ئاماژه ب وێ چه‌ندێ ژى كر كو پارتى دێ سه‌ره‌دانا هه‌موو لایه‌نێن سیاسى یێن كوردستانى ل دۆر پرسا پێكئینانا حوكمه‌تێ كه‌ت.
ل دۆر كارێ په‌رله‌مانى وقانوونێ په‌رله‌مانى، مه‌حموود محه‌مه‌د گۆت” پێرابوونێن پێدڤى بۆ راستڤه‌كرنا قانوونا سه‌رۆكایه‌تیا هه‌رێمێ دێ ده‌ست پێكه‌ن”.
