پارتى رازى بوو
ئه‌ڤرۆ نيوز:
ئه‌ندامه‌كێ شاندێ دانوستاندنكارێ پارتى ديموكراتى كوردستان بۆ پێكئينانا حوكمه‌تا خۆجهيا سلێمانيێ ل گه‌ل ئێكه‌تى نشتيمانى كوردستان و بزاڤا گۆڕان بۆ مالپه‌رێ PDK.info راگه‌هاند كو به‌رسڤا پارتى بۆ پێشنيازێن وان يا ئه‌رێنى بوو.
پشتى د دو رۆژێن بۆرى دا، شاندێ دانوستاندكارێ ئێكه‌تى نشتيمانى كوردستان و بزاڤا گۆڕان سه‌ره‌دانا پارتى ديموكراتى كوردستان كرى بۆ دانوستاندنێ ل سه‌ر حوكمه‌تا خۆجهيا سلێمانيێ، چه‌ند پێشنيازه‌ك خستبوونه به‌ر پارتى ديموكراتى كوردستان ب مه‌ره‌ما پشكداريكرنێ د حوكمه‌تا خۆجهيا سلێمانيێ دا و به‌رسڤا پارتى ژى بۆ وان يا ئه‌رێنى بوو.
زياد كاكه ره‌زا گۆت: “ئه‌م يێن ل سه‌ر خالێن وان رازى بووين، ب تنێ ئه‌وان سێ پۆستێن رێڤه‌به‌رێن ناحيا ب مه دابوون و ئه‌و ناحيه د بچووك بوون، مه خواستيه ناحيێن مه‌زن ب مه ب ده‌ن، ل گه‌ل هنده‌ك پۆستێن ئيدارى”.
دا زانين كو ئه‌و دێ چاڤه‌رێ كه‌ن كا دێ به‌رسڤا ئێكه‌تى نشتيمانى كوردستان و بزاڤا گۆڕان بۆ وان چ بيت.
پارتى ديموكراتى كوردستان ل سلێمانيێ داخوازا ئێك ل سه‌ر 10 يا پۆستێن پارێزگه‌ها سلێمانيێ دكه‌ت و ئه‌و رێژه ژى ئه‌وه يا د هه‌لبژارتنێن وێ پارێزگه‌هێ دا ب ده‌ست خوه ڤه ئينايى و ب مافێ خوه دزانيت.
