پارتى رۆهنكرنه‌كێ به‌لاڤ دكه‌ت
ئه‌ڤرۆنيوز:
په‌يڤدارێ فه‌رمى يێ پارتى ديموكراتى كوردستان، مه‌حموود محه‌مه‌د، راگه‌هاند، ئه‌م ل پارتى ديموكراتى كوردستان تۆمه‌ت وشێوازێ ره‌ق يێ په‌يڤدارێ ئێكه‌تيێ ره‌ت دكه‌ين.
مه‌حموود محه‌مه‌د په‌يڤدارێ پارتى ديموكراتى كوردستان د رۆهنكرنه‌كێ دا گۆت” ئه‌ڤرۆ خوه‌شبه‌ختانه هه‌لبژارتنێن په‌رله‌مانێ كوردستانێ ب هيمه‌تا دلسۆزان ل سه‌قايه‌كێ ئارام وئازاد وئاشتيانه هاته ئه‌نجامدان، سه‌ره‌راى كێماسيان وتێبينيان كو دهه‌ر پرۆسه‌كا دوى جۆرى دا روو دده‌ن، گه‌لێ كوردستانێ ئه‌ڤ ئه‌زموونه ژى ب سه‌ركه‌فتيانه ده‌ربازكر”.
دياركر” ئه‌م دده‌مه‌كى دا سوپاسيا وه‌ستيان وبزاڤێن كۆمسيۆنا بلند يا هه‌لبژارتن وراپرسيێ ل كوردستانێ ورۆلێ به‌رچاڤێ هه‌موو لايه‌نێن په‌يوه‌نديدار وپشكداريا وه‌لاتيان وب تايبه‌ت جه‌ماوه‌رێ وه‌فادارێ پارتا مه دكه‌ين، هه‌ر ژروويێ پێگيريا مه يا تمام ب رێنمايێن كۆمسيۆنێ، رادگه‌هينين كو مه سكالايێن خوه ل سه‌ر هه‌موو وان سه‌رپێچيێن ل هنده‌ك جهان رووداين ب رێێن ئوسولى يێن خوه دا تۆماركرينه ودێ دووڤچوونێ بۆ كه‌ين ودوێ چه‌ندێ دا نه ل پێش روودانان دكه‌ڤين ونه تۆمه‌تێن پێشوه‌خت ژى دداوه‌شينين”.
ئاماژه كر” له‌وما ئه‌وا جهێ حێبه‌تيا مه، داخۆيانيا هيستيريايى ونه ل وه‌ختێ خوه ونه يا به‌رپرسيارانه يا په‌يڤدارێ ئێكه‌تى نيشتمانى بوو، كو گه‌له‌ك ب شه‌پرزانه وبه‌رى كو ئه‌نجامه‌كێ ده‌ستپێكى ژى ده‌ركه‌فتبيت، كه‌فته هه‌لويست وه‌رگرتن وسه‌نگه‌ر گرتنێ ل هه‌موو پرۆسێ وئاراسته‌كرنا تۆمه‌تێن بێ بنه‌ما وشه‌ر فرۆشتن ب پرۆسێ ل هه‌ردو پارێزگه‌هێن هه‌ولێرێ ودهۆكێ”.
گۆت ژى” ئه‌م ل پارتى ديموكراتى كوردستان، دده‌مه‌كى دا هه‌موو وان تۆمه‌تان وشێوازێ ره‌ق يێ په‌يڤدارێ ئێكه‌تيێ كو دناڤ حزبا خوه ب خوه دا گه‌له‌ك نه‌ماى وبۆ راستڤه‌كر، ره‌ت دكه‌ين، هيڤيدارين ئه‌و توره‌ييه، كارڤه‌دان نه‌بيت به‌رامبه‌ر رێكارێن توند ورێنمايێن هوور يێن كۆمسيۆنێ كو ده‌ليڤا سه‌خته‌كاريا به‌رفرهه ورێكخستى ته‌نكگرى، يان ژى بزاڤه‌ك نه‌بيت بۆ ڤه‌شارتنا سه‌رپێچيان ب رێيا تۆمه‌تباركرنا خه‌لكێ دى”.
