پارتى: رێگربووين كيانێ هه‌رێما كوردستانێ ژ ناڤ نه‌چيت
ئەڤرۆ نيوز:
د سالیادا 16 ئاب دا، سال رۆژا دامەزراندنا پارتی دیموکراتی کوردستان، مەکتەبا سیاسی یا پارتی پەیامەک بەلاڤکر، دپشکەکا پەیامێ دا ھاتیە، بەری 72 سالان دەمێ نەئومێدی ب سەر نەتەوا کورد دا ھاتی، پارتی دیموکراتی کوردستان وەکو چرایەکی ھەلبوو تاکو تاریێ وبێ ئومێدیێ لادەت ودوبارە ورە وباوەریێ دناخێ مرۆڤێ کورد دا ڤەژەنیت.
مەکتەبا سیاسی پارتی دیارکر ژی” پارتی وەکو بەرسڤدانا غەدرا دیرۆکی یا بێ بەھرکرنا کوردان ژمافێ چارەنڤیس، بۆ ب دووماھی ئینانا بن دەستیێ، بۆ وێ چەندێ نەتەوا کورد وەکو نەتەوێ مەزن یێ چارێ ل دەڤەرێ پێگەھێ شایستە یێ خوە بدەستڤەبینیت، وەکو پێدڤیەکا دیرۆکی وگوزارشت ل ئیرادا مللەتەکی ھاتە مەیدانێ کو بەرھەڤ نەبوو بن دەستیێ وپاشکویەتیێ وەکو قەدەر وچارەنڤیسەکێ نەگۆر قەبوول بکەت”.
دیارکر ” ئەڤرۆ کو بیرەوەریا 72 سالیا دامەزراندنا پارتیا خوە دکەین، پارتیا مە ھەمان ورە وباوەری وبەرچاڤ رۆھنی، ب ھەمان پێداگیری ل سەر پرنسیبێن نەگۆر یێن گەلێ مە وبگرە زێدەتر ژی ژ جاران، یا رژدە ل سەر سیاسەت وھەلویستێن خوە، رژدە ل سەر پاراستن وب ھیزکرنا قەوارێ کوردستانێ کو ل پێنج سالێن بۆری دا ب جۆرەھا پیلان وشەر پێ فرۆشتن وسەنگەر لێگرتن دخواستن ژناڤ ببەن ورەنجا 100 سالی یا کوردان ب بای بدەن”.
ئاماژە دا” ل پێنج سالێن بۆری پارتیا مە ب ورە وباوەریەکا پۆلایی روو ب روو ھەموو وان گەفان بوو وخوەشبەختانە ئێک ل دووڤ ئێک دا ھاتنە شکاندن، پارتیا مە وسەرۆک بارزانی رێبەرایەتیا شەرێ بەرگریێ ژکوردستانێ وشکاندنا داعشێ ب پیرۆزی گەھاند”.
مەکتەبا سیاسی یا پارتی گۆت ژی” پارتی ل بەردەم شەرێ برسیکرن ونان برینێ دا، نەھێلا کوردستان چوکی بدانیت وتەسلیم بیت وتاکو نانبر بێ ئومێد بووین، نەھێلا مەرەما بەرەیێ خوەبدەستڤەدای بھێتە دی وقەوارێ ھەرێما کوردستانێ ب ھەلوەشیت وب سەر چەند پارێزگەھەکێن زەلیل وپاشکودا پارچە بیت”.
خویاکر ژی” پارتیا مە ب سیاسەتەکا حەکیمانە وبێ کێمترین داگیران ل سەر مافێن مە یێن رەوا، سزایێن نەرەوا ل سەر کوردستانێ ھەلوەشاندن وپێگەھێ کوردستانێ یێ جیھانی زێدەتر ژ جاران بۆ زڤری، پارتی شیا ب تنێ ملی خوە بدەتە بەر بەرپرسیارەتیێ تاکو ئاسوویێ چارەسەریێ ل بەردەم ھەموو قەیرانان دا ڤەکەت وگرفتان بەر ب دووماھیێ ببەت”.
دپشکەکا دی یا پەیاما مەکتەبا سیاسی دا ھاتیە” ل ھەلبژارتنێن عیراقێ ژی دا، ھەموو ئەو ھیزن وناڤەندێن خەونێن حێشتران ب بچووک بوون ونەمانا پارتی ڤە ددیت، خەلکی کوردستانێ باشترین بەرسڤ دا وان وئەو دەنگ وباوەری ب پارتی دا، جارەکادی بۆ دۆست ونەحەزان دیارکر کو پتریا گەلێ کوردستانێ پشتەڤانێ پارتی نە وھەلویستێن وی ب گوزارشتێ ل ئیرادا ئازادیخوازا خوە دزانن”.
دیسا تێدا ھاتیە” ئەڤرۆ کو سالیادا دامەزرادنا پارتیا خوە دکەین، ل بەردەم ئیستیحقاقا ھەلبژارتنەکا نوو داینە، کو پشت ب خودێ وب گەلێ کوردستانێ ئەنجامێن وێ دێ سەرکەفتنەکا دێ یا شەرەفمەندانە بیت بۆ پارتی ورێبازا کوردایەتیێ وخوە نەچەماندنێ، سەرکەفتنا پارتی دێ پەیامەکا دی بیت بۆ دۆست ونەیاران، کو پارتی چەقا دۆزا رەوا یا کوردی یە، نوونەرا خواست وئیرادا گەلێ کوردستانێ یە وھەر خەون دیتنەک ب بچووککرن وپەراوێزخستنا پارتی، خەون دیتن ب پەراوێزخستنا مللەتێ کورد کو چو جاران قابلێ بچووکرنێ نینە”.
دیارکر ژی” ئەڤ ھەلبژارتنە دێ بیتە دەستپێکا قۆناغەکا نوو یا دەستپێکرنا ئاڤەدانیێ وگەشەپێدانێ وپێشخستنا کوردستانێ کو سالێن بۆری ب ئەگەرێ شەری وسیاسەتا برسیکرنێ وململانیا نە ئەرێنی وگرفتێن ناڤخوەیی راوەستابوو، ما دەم ئەم ل پاراستنا کوردستانێ وشکاندنا پیلانێن ھەلوەشاندنا قەوارێ ھەرێما کوردستانێ دا ب سەرکەفتین، ئێدی دەمێ دەستپێکرنێ یە ب پێشخستن وگەشەپێدانا وەلاتێ مەیە، ئەڤ ھەلبژارتنە دێ باوەریێ وشەرعیەتێ ب دەزگەھێن کوردستانێ نوو کەت ب پێکئینانا پەرلەمانەکێ نوو وحوکمەتەکێ ب پشتەڤانیەکا ب ھیزتر تا دانانا دستوورەکێ سەردەمیانە بۆ ھەرێما کوردستانێ کو حوکمرانیەکا ساخلەمتر ژێ دیاربیت، ھەڤدەم دێ دەنگێ مە ژی زەلالتر کەت ل عیراقێ بۆ بەرگریێ ژ مافێن دستووری یێن کوردستانێ و ل ناڤخوە ژی دا ب ئیرادەکا جدی تر کار بۆ چاکسازیەکا سەرانسەری بکەین کو ب مفایێ بدەستڤەئینانا دادپەروەریا جڤاکی وشەفافیەتا زێدەتر وخوەشگوزەرانیا خەلکێ کوردستانێ بیت وبانگەوازیا مە بۆ جەماوەرێ پارتی ئەوە ب بەرفرەھی پشکداریێ دوێ پرۆسا دیموکراتی دا بکەن ووەکو ھەمیشە ژی دئاستێ ناڤەدەنگیا بلند یا پارتیا خوە دا بن”.
ئاماژە دا” عیراق ودەڤەر ب رەوشەکا دژوار دا دەرباز دبن، ئاستێ نەرازیبوونا خەلکی ژ کارێ حوکمەتێ ودەزگەھان یێ زێدەتر دبیت، قەیرانا پێک نەھاتنا لایەنان درێژبوویە، دڤێ رەوشێ دا بۆ ھەموو لایەکی یا رۆھن بووی کو ھەکە مانا عیراقێ وەکو وەلاتەک مەبەست بیت، ژبلی زڤرینێ بۆ دستووری وئەو پرنسیبێن عیراقا نوو ل سەر ھاتیە دامەزراندن، چو رێیێن دی نینن وبانگەوازیا پارتی بۆ ھەموو لایەنێن کوردستانی ئەوە ناکۆکیێن ناڤخوەیی لادەن وپێکڤە وب ھەماھەنگی وئێگ گوتاری ب دەنگەکێ ئێکگرتی یێ ب ھێز ل بەغدا ھەم داخوازیێن خوە یێن دستووری بچەسپینین وھەم کاریگەریا مە دێ یا ب ھیز بیت بۆ راستڤەکرنا عیراقێ وڤەگەراندنێ بۆ دستووری سالاری وپێکئینانا حوکمەتەکا خزمەتگوزاری”.
مەکتەبا سیاسی یا پارتی د پەیاما خوەدا دبێژیت” دسالیادا 16 ئاب دا، سۆزێ بۆ سەرکردە ودامەزرێنەرێ پارتی مستەفا بارزانیێ نەمر وئیدریسێ ھەردەم ل یاد وھەموو شەھیدێن پارتی ورێیا رزگاریا کوردستانێ نوو دکەین کو پارێزەر وقوتابیێن ب وەفا یێن ڤێ رێبازێ بین وتا بدستڤەئینانا وان ئارمانجێن کو وان ل پێناڤێ دا گیانێ خوە سپاردی، بەردەوام بین، ل سالیادا 16 ئاب دا، سەرێ رێز ونەوازشێ بۆ شەھیدێن کورد وکوردستانێ نوو دکەین، ل ئێکەم شەھیدێ شورەشی تا وان پێشمەرگێن قەھرەمان ب بەختکرنا گیانێ خوە کوردستان وخەلکێ وێ ودەڤەرێن کوردستانی یێن دەرڤەی ئیدارا ھەرێمێ و ب سەدان ھزار ئاوارە وپەناھند ژ نەتەوە وئایینێن جودا جودا ژ سەرسەخترین دوژمن پاراستین، ئەوێن ب قەھرەمانیا خوە سەنگێ کوردان ل جیھانێ گەھاندیە لوتکێ رێزێ، سلاڤ بۆ مالباتێن وان یێن سەربلند، سلاڤ بۆ ھێزا پێشمەرگێ کوردستانێ کو نەکو ھەر مەردانە کوردستان ژ شەرێ داعشێ دا سەرخست، بەلکو سەلماند کو ل سەر ھەموو ناکۆکیێن ناڤخوەیی نە وژێیاتیا ئێکێ تنی بۆ ئاخ وخەلکێ کوردستانێ یە”.
