پارتى و پارتيێن نه‌رازى شێوازێ ب ده‌ست هژمارتنا ده‌نگان ل سلێمانيێ ره‌ت دكه‌ن
ئه‌ڤرۆ نيوز:
ل ده‌سپێكا ده‌سپێكرنا هژمارتنا ده‌نگان ب ده‌ستى ل پارێزگه‌ها سلێمانيێ، نوونه‌رێ پارتێن نه‌رازى، (هه‌ڤپه‌يمانى، گۆڕان، ئێكگرتوو و كۆمه‌ل) هۆلا جوداكرنا ده‌نگان ب ده‌ستى ب جهـ هێلا.
هاوژين عۆمه‌ر، به‌رپرسێ ناڤه‌ندا هه‌لبژارتنێن كۆمه‌لا ئيسلامى يا كوردستانێ د كۆنگره‌كێ رۆژنامه‌ڤانى دا راگه‌هاند كو پرۆسا هژمارتنا ده‌نگان ب ده‌ست گه‌له‌ك نه‌يا روونه و مه وه‌كو شه‌ش لايه‌نێن سياسى بايكوتا پرۆسێ كر.
ئاشكه‌را ژى كر كو رێ ناده‌ن چاڤدێريا پرۆسێ بكه‌ن و گۆت: “چاڤدێريكرن ب تنێ ب رێيا 12 بۆ 15 مه‌ترايه ژ جهێ جوداكرنا ده‌نگان، ئانكو ب تنێ ژ دوور ڤه رێ هاتيه دان كو ته‌ماشه بكه‌ن”.
ئاماژه ب وێ چه‌ندێ ژى كر هه‌رده‌ما ئه‌ڤ ئه‌نجامه ژى هاتنه راگه‌هاندن ئه‌و وه‌كو لايه‌نێن نه‌رازى دێ دووباره تانێ ل ڤان ئه‌نجامان ده‌ن.
نه‌ڤه‌شارت ژى كو ئه‌وان خواستيه هه‌موو ده‌نگ ب ده‌ست بهێنه هژمارتن و تان ل سه‌ر هه‌موو سندوقان هه‌بوويه، به‌لێ ئه‌وان ژماره‌كا گه‌له‌ك كێم يا سندوقێن هه‌لبژارتنان برينه جهێ ب ده‌ست هژمارتنێ و گۆت: “نها ئه‌م نوزانين ئه‌و كيش سندوقن برينه جهێ ب ده‌ست هژمارتنێ و ل سه‌ر چو پيڤه‌ر ئه‌ڤ 188 سندوقه هاتينه ده‌ستنيشانكرن”.
ژ لايه‌كێ دى ڤه ب گۆره‌ى پێزانينێن ل به‌ر ده‌ست ئه‌ڤرۆ نيوز، پارتى ديموكراتى كوردستان ژى بايكوتا ب ده‌ست هژمارتنا سندوقێن ده‌نگان ب ده‌ست ل پارێزگه‌ها سلێمانيێ كرن.
